AMBOT og unsay nasulod sa utok ni Cebu City Councilor Alvin Dizon nga gusto man niyang wagtangon kining pagpang-isyu og Enhance Community Quarantine (ECQ) pass sa dakbayan ngadto sa mga residente.
Matod sa konsehal nga imbis mahapsay, naghatag na lang kuno hinuon kini og kagubot sa mga tawo.
Gawas niini, ingon niya nga posibling ang pass maoy usa usab sa mga hinungdan nga makapakatap sa coronavirus sanglit mapasa-pasa man kini ngadto sa lainlaing tawo.
Tinuod nga adunay kaguliyang ug kasamok nga nahitabo sa pagpanghatag sa ECQ pass, pero ang rason mao ang dili maayong pamaagi sa pag-distribute ug ang kakuwang sa pag-imprinta niini maoy nakatampo og dako sa mga reklamo.
Ang katuyoan sa ECQ pass mao nga makontrolar ug magiyahan ang katawhan aron mapatuman nga social distancing nga maoy usa sa paagi nga malikayan ang virus. Mao usab kini ang gigamit sa ubang mga local government unit (LGUs).
Kalabot sa iyang giingon nga makadugang ang pass sa pagpakatap sa maong sakit, ambot og aduna ba usab siyay ikaproyba niini o ba kaha bunga lang kini sa iyang imahinasyon.
Kon atong sakyan kining gisugyot ni Dizon, hayan sa usa ka panimalay aduna na unyay duha o tulo ang magdungan og panggawas.
Ug tungod niini hayag ang posibilidad nga mawagtang ang katuyo-an sa social distancing. Naglisod man gani ta sa pagpatuman bisan og anaa nay ECQ pass unsa pa kaha kon wagtangon na ni.
Mas maayo pa siguro og isugyot ni Dizon nga ipasunod ni Labella ang gihimo sa ubang LGU nga i-schedule ang tagsa-tagsa ka mga barangay kon unsang adlawa nga makaadto sa merkado o kaha unsang adlawa nga tugotan sila nga makagawas. Makatabang pa ni.
Dili nang sugyot nga makadugang lang hinuon sa kalibog sa mga tawo.