Kinsay makadawat sa financial assistance sa Dole?

ORMOC City, Leyte - Mga trabahante sa pribadong kompaniya ang makadawat og ayuda gikan sa Department of Labor and Employment (Dole).

Giklaro sa Dole nga kadto lang mga trabahante sa kompaniya nga mihimo og temporary closure ug flexible work arrangement tungod sa krisis sa coronavirus iisease (Covid-19) ang makadawat.

Matod ni Edgar Tabuyan sa Dole Ormoc Field Office, ang mga employer o agawon sa mga trabahante ang mosumiter sa ilang payroll sa Pebrero hangtod Marso lakip na ang Establishment Report of Covid Form nga ma-download sa Dole website nga http://camp.dolero8.org.ph

Kon mahuman na kini, pwede na kini i-email sa employer sa sama nga website aron ma-process sa Dole.

Ang matag trabahante makadawat og one time nga P5,000 nga financial assistance nga magamit mentras wala pay saktong trabaho.

Giklaro ni Tabuyan nga ang kadtong mga trabahante nga nag trabaho gihapon sa sakto ug regular nga oras, di makadawat sa maong ayuda gumikan kay nagdawat man gihapon kini sa regular nga sweldo.

Para sa mga informal sector workers o kadtong dili empleyado sa pribadong kompanya sama sa manindahay og kandila ug traysikad drivers, naay TUPAD o Tulong Panghanapbuhay sa Ating Disadvantaged/Displaced Workers Program ang Dole.

Ang kwalipikadong beneficiaries makadawat og minimum wage per day kung sila mo himo sa pag disinfect sa ilang balay ug palibot sud sa 10 ka adlaw sa una pa madawat ang sweldo.

Ang maong programa i-implementar pinaagi sa mga barangay o diba kaha sa lokal nga kagamhanan.

Matod ni Tabuyan, si kongresista Lucy Torres - Gomez migahin usab og pundo para sa mga munisipyo sa kwatro distrito sa Leyte alang sa lahi nga TUPAD o cash for work program sa mhga informal sector workers.

Dugang ni Tabuyan nga naa sa P6 milyones kapin ang para sa dakbayan sa Ormoc.

Gihangyo ni Tabuyan ang katawhan nga magpaabot lang kay padayun nila nga gi proseso ang tanan nga mga dokumento nga gisumiter sa ilang buhatan.

Sa mga overseas Filipino workers (OFW) nga apektado sa krisis sa Covid-19, duna usab ihatag nga tabang pinansyal ang Dole.

Matod sa Dole, hatagan nila matag OFW og one time nga P10,000.

Aron makadawat, kinahanglan ang OFW mosumiter og certificate of employment nga giisyu sa gitrabahoan nga ahensya.

Ang aplikasyon i-evaluate ug i-process sa Philippine Overseas Labor Office (POLO) o sa Overseas Workers Welfare Administration (Owwa).

Giabisohan sa Dole ang mga OFW nga mo duol o mo-contact sa POLO kung asa sila nga nasud nahimutang ug kung naa sila sa Pilipinas, pwede sila mo bisita sa OWWA. (JKDP)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph