D-league aspirants cup kanselahon?

MAGPAHIGAYON og online meeting ang Philippine Basketball Association (PBA) Board aron planuhon kon unsay angayan nilang buhaton sa kasamtangan season nga temporaryong giundang gumikan sa coronavirus disease (Covid-19).

Nagkanayon si Commissioner Willie Marcial nga ang nagpatawag ning panaghugpong mao si league chairman Ricky Vargas. Mao kini ang labing unang panaghugpong sa kadagkuan sa PBA sukad gisuspenso sa liga ang mga duwa sa Philippine Cup tungod sa enhanced community quarantine (ECQ) nga gipatuman sa gobiyerno sa tibuok Luzon.

Ang ECQ nakatakda ng mahuman karong Abril 12 apan nalantawan nang daan sa PBA Board nga aduna kini extension hinungdan nga kinahanglan nilang mohimo og lakang.

Nagtuo si Marcial nga taodtaod pa una mahibalik ang mga duwa sa Philippine Cup.

Tungod niini, matod ni Marcial nga mas midako ang posibilidad nga maus-os sa duha na lang ka mga komperensya ang mapahigayon ning maong season imbes nga tulo. Nidugang si Marcial nga posible sab nga kanselahon na lang ang PBA D-League Aspirants Cup.

“The board will assess the situation and will make a thorough study kung ano ang magandang gawin,” pasabot ni Marcial sa PBA website.

Sa panahom ni Marcial, ang labing sayo nga mahibalik ang mga aksyon sa liga karon pang Hunyo. Gipasabot ni Marcial nga kon masumpo na ang Covid-19 karong Mayo, hayan kinahanglan pa nilang mohatag og lugway nga usa ka buwan aron makapangandam ang tanang teams.

Wala sab isalikway ni Marcial ang posibilidad nga mas dugay pa mahibalik ang mga aksyon sa PBA gumikan kay nag-agad ra kini kon kanus-a mawagtang ang Covid-19. (ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph