DILI lang sa buhat, mitabang sab ang San Miguel Corporation (SMC) sa pagpakigbatok sa makalilisang nga coronavirus disease (Covid-19) pinaagi sa mga pulong.
Ang tulo ka teams sa Philippine Basketball Association (PBA) nga gipanag-iya sa SMC nagpagawas og videos sa social media nga giulohan og "Sama-Sama sa Laban" diin ang matag video nagdasig sa frontliners.
Sa samang higayon, ang mga magduduwa ug mga opisyal sa San Miguel Beermen, Brgy. Ginebra Gin Kings ug Magnolia Hotshots nag-awhag sa katawhan nga magpuyo lang una sa panimalay aron malikayan nga mokatap pa ang virus.
Alang kang San Miguel big man JuneMar Fajardo, ang mga doktor, nurses, medical workers, military, police, grocery personnel, ug uban pang frontliners mao ang tiunay'ng mga MVP ning krisis sa kahimsog nga mingkuyanap sa tibuok kalibutan.
“Sa lahat ng frontliners natin, salamat sa sakripisyo ninyo. Kayo ang tunay na Most Valuable Players naming mga Pilipino,” matod ni Fajardo, kinsa napatik sa kasaysayan isip bugtong magduduwa nga nahimong MVP sa PBA sulod sa unom ka sunod sunod nga katuigan.
Ang makapadasig nga mga pulong gikan sa tulo ka SMC teams gipagawas usa ka adlaw sa wala pa gipadangat sa higanteng kompanya ang ilang pinansyal ug materyal nga mga hinabang alang sa mga Pinoy nga apektado sa Covid-19.
“Malalagpasan din natin ito ng nagtutulungan,” asoy ni Ginebra forward Japeth Aguilar.
Gawas ni Fajardo, ang uban ningbuhi'g makapadasig nga mga pulong gikan sa kampo sa Beermen mao sila si Chris Ross, Arwind Santos, Mo Tautuaa, Terrence Romeo, ug Marcio Lassiter.
Gawas kang Aguilar, ang uban ningsulti sa habig sa Ginebra mao sila si LA Tenorio, Prince Caparal, Scottie Thompson, Joe Devance ug Mark Caguioa.
Sa habig sa Magnolia mao sila si Paul Lee, Ian Sangalang, assistant coach Johnny Abarrientos, Mon Abundo, Rome Dela Rosa, ug Marc Pingris. (ESL)