KON dili pa tungod ning krisis karon nga giatubang sa nasod ug sa tibuok kalibutan karon, hayan ang tuig 2020 mao na gyud unta ang mag-abli og dugang oportunidad ni Clyde Azarcon, ang bag-ong World Boxing Foundation (WBF) Intercontinental minimumweight champion.
Niadtong Marso 9, 2020, mikang-a ang pultahan sa damgo sa 25-anyos nga lumad nga taga Davao del Sur, apan ania na magbasehan sa Sugbo human niya malangkat ang titulo pinaagi sa makutas nga majority decision batok ni Mike Kinaadman sa main eventa sa Fight Night IV sa Robinson’s Galleria.
Gikatakda na unta usab siya nga moaway karong Hunyo apan tungod niining coronavirus nga mihulga sa tibuok kalibutan, temporaryong mitidlom ang kahigayonan.
Giangkon ni Azarcon nga taliwala ning krisis karon, iyang gisagubangan ang malisod nga dalan tungod ug alang sa iyang pamilya.
Pipila ka adlaw gikan sa iyang malampusong nga paglabni sa kampiyonato, si Azarcon uban sa iyang kapikas nga si Analyn ug tulo ka mga anak miuli didto sa ilaha Villaba, Leyte.
Plano ra unta niya nga mobakasyon sa hamubo nga panahon ug mobalik gilayon dinhi sa Sugbo aron pangandaman na usab ang sunod niyang away.
Apan gumikan sa lockdown nga giimplementar sa tibuok kapupud-an, natanggong karon si Azarcon ug nakig-uban sa iyang mga minahal sa kinabuhi didto sa Villaba, Leyte.
Sa pagka-karon, aron mapadayon ang suporta sa pamilya, wa niya usiki ang panahon sa pagpangita og kapanginabuhian. Iyang gisudlan ang bisan unsa nga trabaho.
“Wala sir, sideline kog work diri samtang wala pako kabalik sa Cebu. Deliver og tubig,” tug-an pa niya.
Apan taliwala ning tanan, mapasigarbuhon nga gipahibawo ni Azarcon ang usa ka butang nga nakahupay kanila bisan pa man kalisdanan.
Sa niaging semana, ilang nasuta nga gitugahan na usab sila sa Kahitas-an og laing anghel sa ilang pamilya.
“Lipay gihapon Sir, bisan og lisod kaayo labi na karon sa sitwasyon nato aning virus kay naapektohan ta tanan pero sa karon nga buntis ako asawa happy kaayo mi kay og makakita ko sa akong mga anak bisan kapoy mawala ra tungod sa ilaha kay sila akong inspiration,” dugang saysay sa usa sa pambato sa Big Yellow Promotions.
Dili pa man tuod matino kon lalaki ba o babaye, apan ang gisabak ni Analyn maoy ilang ikaupat nga bata sulod sa lima o kapin ka tuig nilang panagkauban.
Si Karl Luis Irabon Azarcon, 4-anyos, maoy ilang kamaguwangan, ikaduha sil Kylie, 2-anyos, ug ikatulo usab si Clyde Jr., nga mag usa ka tuig pa lang ang pangidaron.
Sa higayon nga mahibalik na ang normal nga dagan sa panahon, tuyo ni Azarcon nga mobalik gilayon sa Sugbo aron dinhi ipadayon ang hinayhinay nga pagsubang sa iyang boxing career.
Apan gawas sa katuman, labaw sa tanan, nakulit usab sa iyang alimpatakan nga ugma damlag makab-ot ang iyang laing damgo sa kinabuhi nga magpahugot ang iyang relasyon sa iyang asawa ug pamilya - ang pagpakasal sa simbahang Katoliko. (JBM)