TALIWALA ning panahon diin naghatag og dakong kahasol sa tibuok kalibutan ang makalilisang nga coronavirus disease (Covid-19), si mixed martial arts (MMA) superstar Conor McGregor padayon nag hunahuna sa iyang karera.
Taodtaod na sab nga naghisgot si McGregor kabahin sa iyang tinguha nga mosagubang og laing tahas sa boksing ug ning higayuna, si Filipino boxing icon Manny Pacquiao maoy kaatbang.
Ning bag-uhay lang, gilab-as ni McGregor kining maong isyu ug ning higayuna, iyang gipadayag nga dako ang posibilidad nga madayon kini sa sunod tuig.
“You know I’m going to be bold and say that it happens next year in 2021,“ matod ni McGregor sa interbyu sa ESPN.
“Pacquiao is probably searching for events that can bring him nine-figure paydays. From a theoretical standpoint, it could be, Conor McGregor.”
Mas midako ang pagtuo ni McGregor nga madayon ang away human mipirma ang Pambansang Kamo ng Pilipinas og kontrata sa management company nga nagdumala sa kaniya.
Sa bugtong pa lang niyang away sulod sa boxing ring, si McGregor nasugamak sa 10th round TKO nga kapildihan batok ni American Floyd Mayweather Jr.
Si Pacquiao katapusang miaway niadtong Hulyo sa miaging tuig diin iyang gibukbok pinaagi sa unanimous decision si American Keith Thurman.
Sa iyang bahin, si McGregor mirehistro og makapaukyab nga first round TKO nga kadaugan batok kang Donald “Cowboy” Cerrone sa iyang pagbalik og away sa octagon niadtong Enero ning tuiga.
Nasayod si McConor nga kinahanglan pa niyang mohuwat og taastaas nga panahon gumikan kay aduna pa’y kontrata si Pacquiao sa Premier Boxing Champions diin posible niyang ikaharong si Mickey Garcia sa ulahing bahin ning tuiga.
Apan kining tanang nag depende pa kon kanus-a hingpit nga masugpo ang Covid-19. (ESL)