KAPIN sa 3,000 ka punoan sa marijuana ang naibot sa kapulisan sa siyudad sa Toledo inabagan sa Cebu Provincial Police Office ug 2nd Provincial Maneuver Force Company sa Barangay Pangamihan ug Captain Claudio niadtong Domingo, Abril 5.
Gibana-bana nga mobalor ngadto sa kinatibuk-ang P1.4 milyones ang mga naibot nga puno-an lakip na ang mga pina-ugang dahon sa marijuana nga adunay gibug-aton nga a 1,000 grams gikan sa mga dinakpan. Nadakpan ang mga nananom nga silang Irich Jimm Magbanua, Zosa Panfilo Odvina Labiste ug naka ikyas sila si Avelino Allecer Jr ug Gabriel Lania Allecer.
Samtang nadakpan usab si Ramil Allecer Llaguno, 41 nga nag puyo sa maong lugar nga nakuhaan og 1,200 stalks sa marijuana nga mobalor sa P480,000 ug lakip sa nakuha sa kapulisan ang usa ka .38 kalibre sa armas.
Atol sa gihimong follow up operation nadakpan usab si Avelino Cana Allecer Sr 55, nga nakuhaan usab og usa ka kilo nga pina ugang marijuana nga mokantidad sa P12,000.
Nakuha sa posisyon sa mga dinakpan ang duha ka sako nga puno sa pina-ugang dahon sa marijuana ug ang sakyanan nga Mazda nga kolor gray.
Tungod sa kalampusan nga nahimo sa kapulisan sa siyudad sa Toledo ug sa Cebu Provincial Police Office personal nga gibisita ni General Albert Ignatius Ferro ang iyang mga sakop aron pahalipayan.
Iyang gisaaran ang maong mga police nga hatagan og pasidungog atol sa flag raising ceremony sa Police Regional Office 7 kon ilibkas na ang enhanced community quarantine sa sunod buwan.
Gihatagan usab niyag mga facemask ang mga sakop sa 2nd Provincial Maneuver Force Company nga moabot ngadto sa 200 ka buok, 100 ka paresan sa gloves ug 5 ka gallon sa alcohol.
Samtang gipahibawo usab ni General Ferro nga nakabadlong na silag 2,175 ka mga tawo atol sa pagpatuman sa curfew sa enhanced community quarantine diin kasagaran kanila mga menor de edad.
Gipa-ubos sila sa counseling sa PRO7 ug gipang seminar aron masayod unsa ang coronavirus ug unsay kadaot nga mahiaguman sa lawas kung matakdan sila niini.
Moabot sa 605 ka tawo ang gipamulta, 12 usab ang na inquest sa piskalya ug adunay 12 ang napasakaan ug kaso isip regular filing ug moabot usab sa 354 ang nangadakpan.
Sa violation sa mga sakyanan moabot usab sa 393 ang nangadakpan ug gipang isyuhan og 315 citation tungod sa traffic violation ug moabot sa 100 ang nadakpan sa liquor ban. (AYB)