NAGPA-alim sa iyang samad dinunggaban ang 28 anyos nga biktima sa pagpanunggab sa Sityo Zapanta, Barangay Tejero, Cebu City niadtong Abril 5.
Samtang ang suspek nagpangidaron pa og 15 anyos nga silingan ra sa biktima.
Giila ni PSSgt. Francel Buling sa Waterfront Police Station ang biktima nga si Anthony Astillero, 28, way trabaho ug kasamtangan nga nagpuyo sa South Osmeña Street, Barangay Tejero.
Ang suspek gitago lang sa pangalang Chris.
Na-irita si Chris samtang nagpaniid ni Astillero nga gihulagway nga nagmaoy kay naka-inom. Kalit lang gihansak sa menor de edad ang kutsilyo nga iyang gibitbit.
Samaran diha sa iyang tiyan ang biktima ingon man sa bukton ug gidali sa kabanay sa pagdala sa tambalanan ug misibat ang suspek.
Apan kagahapon, Abril 6 sa buntag mitahan sa iyang kaugalingon ang maong batan-on, kasong frustrated murder ang hayan isang-at sa kapulisan batok kaniya. (BBT)