MOABOT sa 200 ka tawo nga mangatulog lang sa aseras ang gihikling sa Barangay San Nicolas Proper Gym, dakbayan sa Sugbo.
Si Barangay Kapitan Clifford Ninal nagkanayon nga niadto pang Biyernes, Abril 3 gipagamit na ang gym nga magsilbing kapasilongan sa maong mga tawo. Kini sa dihang ilang gipanghipos ang mga anaa nagpuyo daplin sa dalan sa ilang barangay.
Napun-an ang gidaghanon gikan sa 120 ka mga indibidwal sa dihang ang mga sakop sa City Environmental Sanitation Enforcement Team (CESET) nga usa sa maoy gitahasan sa pag panghipos niining mga anaa nangatulog sa dalan tibuok siyudad.
Matud ni Ninal nga sa kasamtangan matubag pa nila ang panginahanglanon kon hisgutan ang pagpakaon sa tulo ka kan-anan, apan kon sa mosunod nga mga adlaw maoy ilang gikabalak-an.
“Ang akong usa gyud nga gikabalak-an ang pag-sustain ani sa pagkaon. Dunay mga kapitan nga mihatag na sa ilang tabang walay problema sa bugas sa pagkakaron kay makaya pa, pero sa pagdagan sa adlaw medyo mao nay gikabalak-an namo labo na nga kon mag dugay ning krisis,” sumala pa ni Ninal sa dihang nahinabi sa Superbalita Cebu.
Duna usab hangyo ni Ninal ngadto sa ubang barangay nga mabahin ang ubang mga tawo ilabi na ang CESET sa pagkakaron dinha sa ila ipanghatud kon duna silay makuha nga tawo.
Laing gikabalak-an sa maong opisyal sa barangay nga wala mapatuman ang social distancing tungod sa daghan na ang ihap sa mga libod suroy.
Sa kasamtangan gipagamit ang kagamhanan nga 12 ka mga portable tents ug upat ka mga portable toilets nga magamit sa mga tawo aron dili nalang magpataka og labay sa ilang hugaw.
Gipatuman usab ang curfew sa maong lugar ug walay gitugotan niini nga makagawas hinungdan nga nangayo kini ug abag sa mga pulis nga mobantay sa gym aron sa pag siguro mga nga walay maka gawas.
Samtang nagpasalamat ang barangay ngadto na sa mga private organization nga mihatag sa ilang hinabang.
Labing kinahanglanon sa mga anaa nga gipang hikling nga pamilya mao ang mga banig,habol,tsinelas,ug uban pang mga butang nga magamit sa matag adlaw. (BBT)