MOST wanted ug iyang kauban napatay atol sa engkwentro tali sa kapulisan sa Sitio Latasan, Barangay Labogon, Mandaue City alas 8:50 sa gabii sa Dominggo, Abril 5, 2020.
Samtang usa ka helper napusilan patay sa iyang manager nga nagduwa-duwa og armas sa samang adlaw.
Ang napatay nga dunay dahang mga kasong giatubang giilang si Allan Ouano, taga Sitio Cardava, Barangay Basak, Mandaue City, nasulod sa 10 ka most wanted person sa rehiyon.
Si Ouano nilang drug personality ug adunay warrant of arrest sa mga kasong murder, frustrated murder, homicide ug giingong gun-for-hire.
Napatay usab ang iyang kauban nga giila nga si Jouaquin Tugono Pepito, 18, taga Barangay Poblacion Occidental, Consolacion.
Sigon ni Police Sr. Master Sgt. SMS. Allain Carado, desk officer on-duty sa Basak Police Station nakadawat ang Basak Police Station og taho gikan sa usa ka concerned citizen nga adunay duha ka armadong mga lalake sa ilang lugar ug nahibaw-an nga si Ouano kini.
Daling girespondehan sa kapulisan ug gi-raid ang iyang gipuy-an.
Pag-abot sa kapulisan, giingong namusil kanila sila si Ouano ug Pepito hinungdan nga nahitabo ang engkwentro.
Daling girespondehan sa Barangay Ibabao Medical Team ang alarma, apan patay nang naabtan ang duha.
Narekober nga mga ebidensya sa lugar gikan kang Ouano ang usa ka revolver nga adunay usa ka bala.
Gikan kang Pepito ang usa ka revolver nga adunay mga bala.
Duwa sa armas
Samtang usa ka helper patay human aksidenteng nakablitan sa manager ang pusil atol sa pagduwa duwa nila sa armas alas 7:54 sa gabii sa Dominggo, Abril 5, 2020, sa Sitio Latasan, Barangay Labogon, Mandaue City.
Giila ang suspek nga si Nelsas Sabarita, 32, nag abang sa Hermag Village l, Barangay Pagsabungan, Mandaue City, operation manager sa usa ka kompanya Sitio Latasan, Barangay Labogon.
Ang biktima giilang si Oliver Jo, 42, helper sa ilang kompaniya.
Nahinabi na sa Superbalita Cebu si PSMS. Allain Carado, desk officer on-duty sa Basak Police Station, sa ilang inisyal nga imbestigayon, niingon nga boluntaryong mitahan kanila si Sabarita dala ang .45 caliber pistol Colt nga way magazine. (KFD)