BISAN kon naa ta sa Enhanced Community Quarantine apan salamat nga duna pa diay gihapoy nibasa nato.
Kay nag-post ko dinhi sa akong cell no. sa miagi natong lindog aron pagsuta lang kon duna pa ba ta’y reader aning kalakiha nga morag ghost town na man ang Sugbo sa kamingaw. Ay salamat kay naa pa diay gihapoy daghan.
Sama aning text message ni 092358451... nga nangutana kon naa pa ba kunoy baligyang Superbalita sud sa quarantine period.
Yes, naa gihapoy baligya ug kaluoy sa Ginoo bisan dinhi sa Liloan naa diay gihapon daghang Super. Pero kinahanglan lang magpaserba kay dali ra kaayong mahurot. Puyra buyag!
Aduna say `ad’ pirme ani ang Superbalita kon asa mo mahimong makapalit. Kami sa Super “work from home’ sad ang among set-up. Tungod sa Covid-19, nausab gyud ang dagan sa atong kinabuhi nga bisan tingali sa imahinasyon wa nato palandunga ni nga mahitabo.
Nia say text message si Rodrigo V. Navarro, Job Order employee sa Cebu City Hall nga dunay cell no. 092152573...nga nagyukbo sa atong mga frontliner.
Matod ni Navarro: “Sir, mopadangat lang ko og mga pasalamat sa mga doktor ug sa uban pa nga nagtrabaho karon sa mga hospital, nga nalayo sa ilang pamilya kay nag-atiman og mga masakiton. Dako kaayo ning risgo sa ilang kinabuhi. Ato silang i-ampo sa Ginoo. Kay may mga pamilya usab sila nga nagpaabot sa ilang pagbalik.” Amen.
Karong Semana Santa atong ipangaliya nga matapos na unta kining maong pagsuway sa Kahitas-an nato. Kay kon magdugay ambot lagi asa kaha ta puniton.
Apan pabor ko nga i-extend pa gamay ang enhanced community quarantine aron masiguro ang kaluwasan sa tanan.
Ug tingali bisan kon malibkas na ang quarantine dapat wala gihapoy pasudlon sa atong mga pantalan ug airport nga taga-laing lugar hangtod nga duna pay hulga sa coronavirus.
Karong Semana Santa siguradong wala ra maglagyo ang atong mga hunahuna. Salamat sa inyong pagbasa ug sa way puas ninyong suporta. God bless and stay safe.