DAGHANG pangagpas karon kabahin sa hinungdan sa Covid-19 nga nilukop sa tibuok kalibutan.
Dunay nagtuo nga binuhatan kini sa China aron lumpagon ang ekonomiya sa Amerika ug sa Europe. Sa unsa nga paagi?
Gipalit nila sa barato ang mga patigayon sa adonahang nasod sa kalibutan human kini nasugamak sa maong pandemic.
Tungod kay apektado ilang ekonomiya napugos sila sa pagbaligya sa barato sa ilang patigayon ngadto sa China.
Dunay nagtuo sab nga binuhatan kini sa impluwensyado ug dagkong opisyal sa gobiyerno sa Amerika aron makatigum sila og trilyones dolyares sa ilang personal nga panudlanan.
Gihimo nila ang maong virus unya mopagawas og dakong pundo ang gobiyerno, kunohay gamiton sa paghimo og bakuna.
Unya pundohan nila ang higanting mga tiggama og bakuna aron iapod-apod kini sa katawhan.
Laing pangagpas mao nga resulta kini sa 5G kining bag-ong teknolohiya nga magpakusog sa atong komunikasiyon labi na sa internet.
Ang 5G mas kusog pa sa naandang gigamit karon sa mga telecommunication company nga 4G. Apan, ang radiation niini doblehon sa napulo ka bahin sa 4G, nagpasabot mopatay kini sa cell sa atong lawas ug momugna og virus mismo sulod sa atong kalawasan.
Sagad sa mga dapit na labihang naapektohan sa Covid-19 mao kadtong mga malambuon nga siyudad ug nasod.
Ang uban nangagpas nga ordinaryo lamang kining Covid-19 kon itandi sa ubang sakit, apan gipadako og maayo sa media hangtod nagmugna kini og kabalaka ug kahadlok sa kalibutan.
Daghan pang mga pangagpas mabati nato sa palibot. Ang labing segurado karon mao nga giabutang nato kining maong pandemic.
Gibuhat sa gobiyerno ang tanang paagi aron mapreserbar ug maluwas ang kinabuhi sa mga tawo gikan niining makatakud ug makamatay nga sakit.
Ang pangutana karon mao nagmatinumanon ba kita sa gipatuman nga polisiya sa gobyerno aron mapugngan kining pagkuyanap sa coronavirus sa atong palibot.
Sa ubang nasod estrikto ug mas grabe pa ang ilang polisiya nga gipatuman. Dinhi sa Pilipinas murag lugak lang gani, apan daghan gihapon gahi’g ulo.