MAAYO na ang kahimtang sa tulo ka mga pasyente nga nagpositibo sa coronavirus disease (Covid-19) nga kasamtangang anaa sa Northern Mindanao Medical Center (NMMC) ning siyudad sa Cagayan de Oro.
Ang maong mga pasyente mao ang 71-anyos nga lalaki nga taga Cagayan de Oro samtang ang duha gawas sa probinsya sa siyudad apan taga Northern Mindanao.
Gibutyag ni Dr. Jose Chan, Medical Director sa NMMC nga nagpaabot nalang nga mag-negatibo ang pinaka-ulahing gihimo nga test aron sila makagawas na.
“Ang tulo (3) nga naghulat ta nga mopauli sila kung ang resulta sa ilang testing negative na,” matud ni Chan.
Gidugang pa nga recovering kini sila ug wala na’y mga reklamo sa ilang panglawas apan dili pa kini makapauli ilabi na kinahanglan pa nga masigurong negatibo na ayha makagawas sa ospital.
“Maayo naman ilang kahimtang karon wala na sila’y reklamo pwedi na sila unta mopauli gayud lang because positive sila atong gihulatan nga sigurado siyang negative kung mopauli siya,” dugang pa.