MOBALOR P1.8 milyones nga resvent turbine ventilator ang pormal nga gitunol ni Misamis Oriental Governor Bambi Emano ngadto kang Dr. Jose Chan, ang Medical Director sa Northern Mindanao Medical Center.
Gipasabot ni Emano nga ang maong ventilator gidonar sa Lucio Tan Group - chairman of Philip Morris Fortune Tobacco Corp Inc ug Jaime V. Ongpin Foundation Inc. ngadto sa lalawigan sa Misamis Oriental ug siya maoy gitahasan sa pagtunol sab niini ngadto sa NMMC nga karon gikonsiderang Apex sa mga kaso sa coronavirus disease.
Ang turn-over gipahigayon sa buhatan ni Emano kung diin mapasalamaton nga midawat niini si Chan.
Matud sa doktor nga dako kini kaayo og tabang sa balay tambalanan labina nga nakigbatok ug nakigbisog ang tanan nga mahunong na kining virus.
Ang Tanduay Inc. ubos sa branch manager nga mao si Ferdinand Gaitera ug sales supervisor nga si Melvin Caniedo ang mitunol sab og 150 ka boxes sa alcohol kon diin moabot 600 kapin ka lapad sa alcohol ang gidonar usab sa lalawigan.
Pormal kining gidawat ni Emano ug Provincial Health officer Dr. Jerie Calingasan nga gitakda sab nga iapod- apod alang sa mga healthworkers sa lalawigan ug mga frontliners diha sa mga checkpoints.