MGA anaa sa 500 ka indibidwal ang nisalmot sa gipahigayong relihiyosong panagtigom niadtong Abril 5, 2020 bisan pa man sa bahad sa coronavirus disease (Covid-19) ug sa gipagawas nga ordinansa sa lokal nga kagamhanan sa siyudad sa Cagayan de Oro.
Gisikop sa kapulisan sa Police Station 1 (PS1) sa Divisoria sa pagpangulo ni Police Captain Sebastian Chua ang pastor nga si Alfred Caslam, 58, minyo, residente sa Zone 6, Barangay Cugman kinsa maoy nag-organisa ug panagtigum sa Word of God Spirit and Life Ministries Inc. nga nahimutang sa Capistrano-Rizal streets ning siyudad.
Sa pakighinabi kang Antonio Resma Jr., sa Regulatory Compliance Board (RCB) gibutyag niini nga gisikop ang pastor tungod kay nisupak kini bisan paman sa hangyo nga hunungon una ang bisan unsa nga panagtigom.
Ang maong mga indibidwal ang gipapauli ra usab human nga wala man kini nisupak dihang gibadlong.
“Yes, wala man sila mosupak. Kaning organizer imbis gihangyo nga undangon na ang ilang activity nisukol man hinoon busa gidakop,” matud ni Resma.
Nasayran nga gibadlong na kini niadtong nilabay nga semana apan nagmagahi ug gisubli pa ang panagtigum.
“Gi-adtoan na siya last week, ganina ni-adto ang punong barangay uban ang Cocpo, wala maminaw busa ni adto ko ug gipa dakop na nato,” dugang ni Resma.
Nasayran nga hugot nga gi-implementar ang EO no. 052-2020 diin gimando ang pagpatuman sa social distancing aron nga malikayan ang grabe pa nga pagkuyanap sa nahisgutang virus labi na sa dakbayan.
Kadaghanan sa mga nitambong sa maong kalihokan mga senior citizen ug daghan usab mga bata.
(Profiling)
Samtang gibutyag ni Dr. Lorraine Nery, OIC sa City Health Office (CHO) nga ipaubos sa profiling ang dul-an 500 ka mga indibidwal nga nilakip sa relihiyosong kalihokan kini aron usab masiguro nga malikayan ang pagkuyanap sa Covid-19.
Sutaon una nila ang listahan sa maong mga indibidwal ug subayon kung duna kini mga kasaysayan sa pagbiyahe sa mga dapit nga dunay positibo sa virus.