SI GRESALJE Saldo sa Baguio City miangkon sa titulo sa 3rd APM Online Bullet Chess Tournament, gihimo via lichess.org, Sabado, Abril 4.
Si Saldo, naggamit sa username nga gresalijesaldo, mibugha og 20 puntos sa walo ka duwa aron pildihon sila John Gerard Acedo (john_gerard_acedo) sa Buhangin, Davao City ug Mark John Centillo (MarkJohnCentillo) sa General Santos City nga nabutang sa ikaduha ug ikatulong pwesto.
Si Acedo miani og 18 puntos, samtang si Centillo miiskor og 17 sa online chess tournament nga giisponsoran sa APM Mindanao Chessmates.
Si Saldo napildi kang Centillo sa third round, apan napildi niya si Carl Jason Huliganga, Ervin De Asis, Nofre Reyes, Ian Llanto, Dillon Intilla, Chris Yap ug Charlie Sarigumba.
Ang top three winners midawat og GCash prizes gikan sa organizers.
Samtang si Negros Oriental's Junaico Segismar ang kampeyon sa GMCI Hardware Online Bullet Chess competition nga giduwa via lichess.org, Abril 5.
Si Segismar mihakot og 28 puntos sa 10 outings, gipildi sila Anthony Mosqueda sa Toril, Davao City, Denzel John Amar sa Trading Boulevard, Davao City ug Harrison Maamo sa Matina, Davao City nga mipwesto sa ikaduha, ikatulo ug ikaupat.
Si Mosqueda mitigum sab og 28 puntos samtang si Amar may 24, si Maamo may 22.
Ang kamepyon mipukan nila Reynaldo Quinonez, Christian Aquino, Eddie Resureccion, Jr., Hevsky Reyes, NM Covid_Killer, Jordan Gadayan, Joey Florendo ug Quinonez.
Si Segismar, napildi kang Jeffrey Vegas sa sixth round.
Mga GCash load nga P200, P100, P50 ug P30 gihatag sa mananaug. Ang aktibida giorganisa ni Mark John Centillo. (MLSA)