KINSA ba'y gusto intawon nga modugay ning enhanced community quarantine (ECQ) sa Davao Region? Wala gayod, diin ang tanan gusto nang matapos kini ug mag-selebrar sa kadaugan sa pagbatok ning coronavirus disease 2019 (Covid-19).
Kagahapong adlawa, sa Davao City, istrikto na nga gipatuman ang ECQ diin sa bag-ong kamandoan nga gipagula ni Davao City Mayor Sara Duterte-Carpio, magamit ang Food and Medicine (FM) pass gikan alas 6 sa buntag padung alas 6 sa gabii lamang.
Ang molapas nga mga oras niini, wala nay gitugtan nga mogawas sa panimalay, gawas lamang sa usa ka emerhinsiya, mudo mingaw gyod kaayo ang kadalanan, ug kung kinsa ang masikop sa mga barangay tanud, ihandos sa pulis dayon pahamtangan og silot.
Dili angay nga moreklamo ang katawhan ning panahona kung buot sa gobyerno nga mas-istriktohon pa ang pagpatuman sa ECQ ug kung mahatagan pa kini og lugway, gumikan ang tanang gihimo karon sa gobyerno, alang sa kaayohan sa tanan.
Kay kung nagpa buta-bungol pa lang ang gobyerno ning krisis karon sa Covid-19, lagmit masusama ang Pilipinas sa mga adunahang nasud sama sa Italy, Rome ug USA nga mao karon ang nanguna sa dunay pinakataas nga kaso ug mga nangamatay sa maong pandemic.
Busa, angay lamang gayod motuman ang katawhan ning mga panahona ug kinahanglan ipadaplin lamang una ang komentaryo batok sa gobyerno. Walay perpekto nga tawo, apan kinahanglan lamang niini karon ang pagtuman sa tanan.