SUPERBALITA DAVAO

Dura: Daghang reklamo

Ratsada



SAMTANG hingpit na nga gipatuman ang enhanced community quarantine (ECQ), nagkadaiyang reklamo ang akong nadawat sa among programa sa radyo.

Ang ubang reklamo akong natubag subay sa mga polisiya nga gipatuman sa nagkalain-laing ahensya sa gobyerno.

Sa matag adlaw, daghan ang nangutana nako labot sa Covid-19 Adjustment Measures Program (Camp) nga gipatuman sa Department of Labor and Employment (Dole) ug Social Amelioration Program (SAP) nga gipatuman sa Department of Social Welfare and Development (DSWD).

Sa duha ka mga programa, daghan ang naglibog tungod kay lahi ang naa sa polisiya ug lahi usab ang nahitabo nga implementasyon sa ilang lugar.

Sa akong eksperyensya, daghan ang nagreklamo tungod kay wa sila nakadawat og ayudang pagkaon nga gisaad sa gobyerno.

Tungod niini, ako silang gipasabot nga ang polisiya maoy sumbanan sa paghatag og ayuda sa gobyerno. Apan, ang paglista sa mga angay tabangan nagdepende sa mga opisyales sa barangay, munisipyo, o probinsya mao nga di tanan ang nahatagan.

Kay bisan moingon pa si Pangulong Rodrigo Duterte nga hatagan ang tanang kabus, apan magpatigbabaw gyud ang politics of patronage. Buot ipasabot, ang mahinumdoman sa mga elected officials mao kadtong mga tawo nga nakatabang nila sa milabay nga eleksyon.

Nakaingon ko niini kay daghan sa akong mga parente ug higala ang nagsulti nga wa sila maapil sa listahan.

Gani, pipila kanila nagpakiluoy nga makaremedyo og gamay nga tabang pinansyal nako tungod kay wa na silay makaon.

Di unta sila maingon niini kung politics of service pa ang gihimo sa pipila ka mga elected officials. Buot ipasabot, walay pilion ang elected officials nga tabangan -- bisan wa pa sila giboto sa miaging eleksyon -- ila gyung tabangan.

Mao man gani nga daw maibog ko sa mga katawhan didto sa Ormoc City sanglit matag pamilya gihatagan og tagsa ka sakong bugas sa ilang lokal nga gobyerno.

Hinuon, akong nasabtan ang kapasidad sa lokal nga gobyerno dinhi sa atong rehiyon, mao nga di malikayan nga dunay gyuy magreklamo. Ug aron walay reklamo, mas maayo nga ipasabot sa mga opisyales sa barangay ang polisiya ug kakulangan sa lokal nga kagamhanan.

Sa mga local chief executives dinhi sa atong rehiyon, basin duna pay laing paagi nga mahatagan gyud ang tanan ninyong katawhan gawas sa tabang pinansyal sa nasyunal nga kagamhanan?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph