DAVAO DE ORO -- Sanglit wa na tuguti ang panagtigom sulod sa mga simbahan human nga mikuyanap ang Covid-19, pipila sa mga miyembro ubos sa laing sekta nagpadayon sa ilang mga gimbuhaton apan, atoa gihimo sa mga balay.
Ang Oneway Church sa Barangay San Jose lungsod sa Compostela, sumala pa, wa gilayon miundang sa ilang mga kalihukan sulod sa ilang simbahan sa adlaw'ng Dominggo sanglit, sumala pa wala nalatid ang katin-awan sa Executive Order (EO) nga ipahunong ang serbisyo sa tanang simbahan og sa sinugdan, wa usab sila'y nadawat nga suwat nga nagmando nga sila pahunungon sa regular nilang ginahimo matag-adlaw'ng Dominggo.
Ang usa sa mga pastor sa One Way Church sa Barangay San Jose nga si Pastor Dale Alferez nagbutyag sa Superbalita nga niadtong Marso 29, 2020 ang katapusan nilang pagsimba nga gihimo sulod sa ilang simbahan sanglit sumala pa, giadtoan sila og pulis, mga taga-LGU ingon man duha ka pastor nga opisyales sa Compostela Evangelical Ministerial Fellowship (Cemfel) og sila matud pa, gibadlong sa gihimo nilang panagtigom sulod sa simbahan.
Niadtong higayona, sumala pa nga gihimo nilang pina-short cut ang misa.
Matud pa, nga nakig-istorya ang mga lumilihok sa simbahan sa grupo nga miadto kanila og nadesisyunan sa One Way Church nga di na mopahigayon og misa sulod sa simbahan og didto nalang kini himuon sa balay sa mga miyembro ug bahinon sa napulo ka grupo ang mga miyembro nga adunay kinatibuk-ang ihap nga di muobos sa 150 ka mga tawo lakip mga bata.
Suma ni Pastor Alferez nga gihimo nila ang maong lakang sa pagsimba ug padayong pag-ampo dili tungod sa ilang kaugalingon o sa ilang mga miyembro kundi tungod sa kaluwasan sa tibuok katawhan sa kalibutan sanglit alang kang Pastor Alferez bugtong ang gahom sa Dios ang makasumpo sa Covid-19.
Dako ang pagtuo sa maong pastor nga ang gihimo sa mga tawo nga paggamit og ethyl alcohol, chlorine, face mask, pagsunod sa social distancing ug sa gihimong enhanced community quarantine (ECQ), ug sa regionwide lockdown sa gobyerno magsilbing wa'y pulos kung wala ang proteksyon sa Labaw'ng Makagagahom.
Giingon nila nga ang Diyos Amahan nga maoy matuod nga makaluwas sa katawhan sa gisagubang nga Covid-19 pandemic.
Dugang gibutyag ni Pastor Alferez nga sugod niadtong April 5, 2020 adlaw'ng Dominggo, gibahin sa napulo ka grupo ang gihimo nilang pag-ampo sa nagkalain-laing oras sulod sa usa ka balay ug wa sa simbahan og sa maong pagsimba nga ilang gihimo gisunod nila ang protocol sa social distancing ug uban pa.
Wa'y plano nga moundang sa ilang pag-ampo o pagsimba ang mga miyembro sa One Way Church hangtod nga di mapukan o maundang ang pagkuyanap sa Covid-19, sanglit ang bersikulo sa Bibliya nga ilang gipasikaran mao ang Hebreo 10:24-25 nga diin nakasuwat nga, "magpabilin kitang malig-on sa paglaum nga atong gihuptan kay makasalig man kita sa Dios nga tumanon gayod niya ang iyang saad. Magdinasigay kita sa pagpakita sa gugma ug sa pagbuhat sa maayo. Dili nato undangon ang batasan sa panagtigom sama sa gibuhat sa uban. Magdinasigay hinuon kita labi na kay nasayod kamo nga hapit na moabot ang adlaw sa pagbalik sa Ginoo." (Dexter T. Visitacion)