DAVAO DE ORO -- Luyo sa padayong gipatuman ang enhanced community quarantine (ECQ), usa ka fish vendor ang giunay'g patay sa anak sa iyang gikapuyo didto sa Purok 5, Barangay Bagong Silang, lungsod sa Laak.
Ang biktima giila nga mao si Frederick Mondejar Acebes, 42 anyos nga molupyo sa Purok 5, Barangay Bagong Silang, lungsod sa Laak, samtang ang gitumbok nga suspek ginganlan og Gymrie Fernandico Iyog, 27 anyos, minyo, laborer ug molupyo sa Purok 9, Pamacaum, lungsod sa Asuncion.
Base sa inisyal nga imbestigasyon ang suspek, mibisita niadtong higayona sa iyang inahan nga kapuyo sa biktima ug nangumusta.
Matud pa nga alas 8:00 sa gabii, bisan og gidili ang pag-inom sa ilimnong makahubog isip kabahin sa gipatumang ECQ apan ang biktima nakigtagay'g inom sa suspek didto sa sulod sa balay niini.
Apan, sa dihang nakahurot og lima ka botelyang beer, nakahukom ang suspek ug ang biktima nga modugang og palit diin samtang sila nagsakay sa motorsiklo nga gimaneho sa biktima padung sa haduol nga tindahan.
Sa wala pa sila kaabot sa tindahan, gihunong sa suspek ang motor kinsa mikanaug silang duha ug gilayong gidunggab ang biktia sa makadaghang higayon nga miresulta sa hinanaling kamatayon niini.
Wa madugay mitahan sa iyang kaugalingon ang suspek sa mga opisyal sa barangay ug giindorso kini sa Laak Municipal Police Station. (Dexter T. Visitacion)