GIBAG-O na ang oras sa curfew sa Davao City gikan sa alas 9 sa gabii hangtud alas 5 sa buntag, karon alas 6 sa gabii na kini hangtud alas 6 sa buntag.
Kini ang gibutyag ni Davao City Mayor Sara Duterte-Carpio ug giingon niini nga istrikto na nga pangitaon ang Food and Medicine (FM) pass nga nagsugod Lunes, Abril 7, subay sa gipatuman nga enhanced community quarantine (ECQ) sa siyudad.
"You can only use the FM Pass from 6:01 p.m. to 5:59 p.m.," ingon ni Duterte-Carpio.
Dugang sa mayor, "You don't need a pass when there is an emergency."
Gawas sa bag-ong oras sa curfew, 24 oras na sab ang pagpatuman sa liquor ban sa siyudad.
Walay labot sa curfew ang anaa sa government offices nga dunay kalabutan sa security, health, social services, sanitation, ug disaster; 24-hour groceries/convenience stores, wet markets/palengkes, food commissaries, food processing or manufacturing, ug food delivery services; hospitals, medical laboratories, pharmacies, drugstores, ug uban pang health services/personnel, doctor's ug dentist's clinics; gas stations; funeral parlors; ug ang mass media outlets.
Dili mawagtang ang maong 12 oras nga curfew ang ang taas nga oras sa liquor ban, hangtud nga di mawagtang ang deklarasyon sa state of public emergency. (Jeepy P. Compio/CIO)