GISIKOP ug pasakaan og kaso didto sa korte ang usa ka German national kinsa wala migamit og face mask atol sa iyang pagmaneho og motorsiklo alas 5 sa hapon niadtong Lunes atubangan sa Buhangin Public Market, Buhangin, Davao City.
Kasong pagsupak sa Executive Order (EO) 23, kon "Not Wearing a Protective Face Mask," ang ipasaka nga kaso batok sa langyaw nga si Joseph (bansagon gipatago), 65 anyos, minyo, ug nagpuyo sa Cuidad Ezperanza, Barangay Cabantian, Buhangin, Davao City.
Nasayran nga nasiplatan ang langyaw sa mga pulis sa Buhangin nga maoy nadestino alang sa Motorcycle Riding Safety (MRS) unit sa Quarantine Control Point-2 (QCP-2) sa Tigatto Road diin ang maong langyaw wala misuot og face mask sa iyang pagmaneho sa iyang kolor itom nga Kawasaki Dominar 500 CC.
Giingon nga dihang gihinabi sa mga pulis ang maong langyaw, arogante pa kini nga nanubag sa mga pulis, hinungdan nga gidala siya sa Buhangin police station diin kasohan ug giisyuhan og Temporary Operator's Permit (TOP) gumikan sab walay dala ang nasampit nga langyaw sa mga papeles sa iyang motorsiklo.
Ning kasamtangan, gibalhog sa selda sa Buhangin police station ang nahisgutan kinsa pasakaan og kaso didto sa korte.