KARON nga gimando na man ang pagsul-ob kanunay sa face mask labi na kon mogawas sa panimalay, klaseklase nga face masks ang nang-gawas karon.
Imong makita ang lain-lain nga mga design, color, tela og gidak-on.
Gitugotan kini tungod sa kamatuoran nga dili paigo ang supply sa face masks nga gitugot sa DOH.
Matod pa, maayo na lang nga dunay gitabon sa nawong kaysa wala gyod.
Dili man tuod kini epektibo kaayo nga paagi sa paglikay sa Covid-19 apan maayo na lang.
Dako sab og diperensiya ang hinimo lang og ang klase nga mao gyod ang gitugotan sa DOH.
Lisod iginhawa ug init ang imong pamati sa DOH-prescribed nga face mask. Unya kon magsul-ob ka og antiyohos, mogabon ang samin tungod sa init nga hangin nga gikan sa imong ilong ug baba.
Tungod sa kainit sa DOH-prescribed nga face mask, dali ra nga mosingot ang imong ilong ug baba og maoy hinungdan nga katol kini og lami kaayo kaloton sa kamot.
Lisod gyod kaayo ang paglikay nga dili kaloton ang nawong kon magsul-ob na sa DOH-prescribed face mask.
•••
Kining gihimo karon sa face mask, parehas ra kini sa panahon nga gisugdan pagmando sa LTO ang pagsul-ob sa motorcycle helmet kon moangkas na sa motorsiklo.
Dunay mga klase nga mao gyod ang gusto ipasul-ob sa LTO kay husto kini sa proteksiyon alang sa nag-gamit niini.
Mao kini ang klase nga lig-on ug makahatag gyod og proteksiyon sa ulo sa nagsul-ob kon dunay disgrasya sa kadalanan.
Apan daghan ang mireklamo kay mahal kini. Miabot pa gani ang panahon nga nagnihit ang supply niini.
Mao kadto ang panahon nga nang-gawas ang klase-klase nga mga helmet.
Gani, dihay nakita nga nagsul-ob og helmet nga dunay duha ka antenna sa kilid. Sama kini sa dulaan nga helmet nga maoy gusto sa mga bata.
Apan husto ba kini?
•••
Kining mantinil o inato lang nga paagi delikado gyod.
Sa kaso sa helmet, kon way disgrasya, way problema.
Sama sa face mask, kon way Covid sa imong palibot, way problema sab.
Apan kon dunay disgrasya, dako kaayo ang problema.
Kon madisgrasya ang nagsul-ob sa helmet og mapakong sa dalan, dunay dakong posibilidad nga mabuak kini og motusok sa ulo sa nagsul-ob.
Sa kaso sa face mask, mao sad. Kon dunay magyawyaw sa duol unya mamisik ang laway o plema ba kaha inig pang-hatsing, wa gyoy mahimong proteksiyon ang mantinil lang nga face mask.
Mantinil nga proteksiyon, mao kana ang gihimo karon.
Husto ba kini?
•••
Bisan pa sa pasalig sa mga kadagkoan sa gobierno nga dalion paghatag ang ayuda sa mga katawhan, malangan gyod kini.
Mano-mano ang gihimo nga paglista sa mga modawat mao nga dugay gyod kini mahuman.
Human malista, mano-mano sab ang pagpanghatag sa ayuda. Kon way sakyanan nga magamit, magbaklay lang ang maghatod. Dili komedya kining trabahoa.
Init ang panahon, init pa gyod ang nawong nga giputos og face masks, dili pa gyod ka pakaloton sa imong nawong, perte paita.
Magbagotbot pa gyod ang uban nga makadawat, ngano kuno nga nalangan man paghatag. Pakapinan pa gyod og away nga dunay pihig-pihig sa paglista. Susmariosep, komedyahan ka ana?
•••
Dunay nangutana nga board member kay nagplano kuno ang gobernador nga mo-import og bugas.
Unsaon man nang bugas, ipanghatag o ibaligya sa mga tawo? Unsa man kadaghan ang i-import?
Kon ipanghatag, paigo ba ang gidaghanon niini? Kon gamay lang ang ipanghatag, dili gihapon kini paigo kon molahotay gyod kini si Covid pagpuyo dinhi sa Pinas?
Kon ibaligya, mahimo diay kini?
Kon ipautang, mahimo diay kini?
Mahimo ba diay mag-negosyo og bugas ang probinsiya?
Dili ba hadlok nga mopirma siya sa authority para sa gobernador?
Lisora tubagon oi!