NEGUSYANTE nadakpan sa buy-bust operation sa giingong pagpamaligyag overpriced nga alcohol alas 2:30 sa hapon sa Martes, Abril 7, 2020 sa may Kimtons bldg., Englis V. Rama Ave., Brgy. Guadalupe, Dakbayan sa Sugbo.
Si Nido Señor, 38, minyo, nagnegusyo og water refilling station, lumad nga taga Brgy. Consuelo, lungsud sa San Francisco, mga isla Camotes, nasikop sa joint operation sa Regional Anti Cybercrime Unit (RACU), Criminal Investigation and Detection Group (CIDG) Provincial Field Unit (PFU), ug Food and Drug Administration (FDA) ubos sa pagpakigtambayayong sa Department of Trade and Industy (DTI).
Tungod sa gipatuman nga enhanced community quarantine (ECQ), ang mga ahensya sa kagamhanan nagbantay kanunay sa mga mapamahimudsanon sa higayon.
Si Senor giingong namaligya online og overpriced nga alcohol base sa monitoring sa RACU ug ubang mga ahensya.
Nakuhaan siya og walo ka mga kahon sa 70 percent ethyl alcohol with moisturizer nga ang tanan mobalor lang unta og P16,000 sa suggested retail price (SRP) sa DTI, apan iyang gibaligya og P25,000.
Gawas niini, nabawi usab sa kapulisan ang boodle money nga P25,000.
Pasakaan si Senor og kasong kalapasan sa Republic Act 7581 kun Price Act as amended sa Republic Act (RA) 10623.
Naa si Senor gitanggong sa bilanggoan sa RACU 7, samtang giandam ang kasong ipasaka batok kaniya. (GPL)