70-anyos mi-survive sa Covid; anak: milagro

PAG-AMPO. Si Dr. Francis Daclan (tuo) nagtuo nga milagro ang pagkabuhi sa iyang amahan nga si Porferio (wala), 70, gikan sa coronavirus disease (COVID-19). Si Porferio na-discharge sa University of Cebu Medical Center (UCMed) human sa 17 ka adlaw sukad na-admit. (Tampo ni Dr. Francis Daclan)
PAG-AMPO. Si Dr. Francis Daclan (tuo) nagtuo nga milagro ang pagkabuhi sa iyang amahan nga si Porferio (wala), 70, gikan sa coronavirus disease (COVID-19). Si Porferio na-discharge sa University of Cebu Medical Center (UCMed) human sa 17 ka adlaw sukad na-admit. (Tampo ni Dr. Francis Daclan)

“AS A doctor, I know I witnessed a miracle upon seeing papa’s improvements.”(Isip doktor, nakahibawo ko nga nakasaksi ako og milagro sa kalamboan (sa panglawas) ni Papa.)

Mao ni ang sulti ni Dr. Francis Daclan sa iyang pag-asoy kon giunsa sa pag-survive sa iyang amahan sa mananakod nga coronavirus disease (Covid-19).

Tungod sa kabag-o sa Covid-19 sa natad sa medisina ug ang paagi sa iyang pagtambal, si Daclan nagtuo nga ang pagkaayo sa iyang amahan tubag na sa mga pag-ampo.

Iyang amahan, Porferio Daclan, Jr., 70, dunay daang sakit sama sa diabetes, hypertension ug chronic obstructive pulmonary disease dihang nagpositibo sa Covid.

Matod ni Daclan nga ang sakit sa iyang amahan nagsugod sa hilanat ug ubo ug nagtuo sila nga naandan lang kini nga pneumonia.

Busa, sa ilang balay lang kini nila gitambalan.

Apan, nagkalibanga ang iyang amahan ug kutasan.

Niadtong higayuna, siya nagtuo nga kinahanglan nang dad-on na niya ang iyang amahan sa University of Cebu Medical Center (UCMed) sa Mandaue City niadtong Marso 19, 2020.

“Seeing the x-ray made us suspect Covid-19 infection right away and because of that high-index of suspicion, he was managed to as such na,” asoy ni Daclan.

Niadtong adlawa, ang amahan ni Daclan gibutang sa Intensive Care Unit (ICU), diin gipaslakan siya og endotracheal tube ug gibutangan og mechanical ventilator nga nag-abag kaniya sa pagginhawa.

Isip doktor sa internal medicine, nahimo siyang sakop sa team nga nag-atiman sa kondisyon sa iyang amahan.

Nag-duty siya sa kinatibuk-ang higayon nga gi-admit ang iyang amahan.

Ang amahan ni Daclan naa sa kritikal nga kahimtang sa unang semana sa iyang pagka admit.

Gawas sa mga komplikasyon sa iyang mga baga, duna sab kini komplikasyon sa iyang kasingkasing.

Niadtong higayuna, ang iyang amahan di makasulti.

“But I see it in his eyes that he is not comfortable. I saw fear and anxiety in his eyes at that time, but I know he was fighting really hard,” dugang asoy ni Daclan.

Niadtong mga higayuna, ang iyang pamilya puno sa mga kabalaka ug naglisod usab sila kay ang iyang pamilya gidid-an sa pagduaw sa iyang amahan.

Grabe ang ilang mga kabalaka niadtong mga panahuna,apan ang mga pag-ampo maoy nakapahupay.

Bisan karon, wa sila masayod kon nganong natakdan ang ilang amahan.

Matod ni Daclan nga ang iyang amahan wa mobiyahe mga semana sa wa pa siya ma-admit.

Hinuon, ang iyang amahan mag-adtoan sa pampublikong mga lugar nga maoy naandan sa wa pa gipatuman ang enhanced community quarantine.

Sa ilang balay, nagtakda silang pamilya og tinuig nga nobena kang San Vicente Ferrer nga tapuson sa iyang kapistahan sa Abril 5.

Nagpadayon siya sa pag-ampo samtang naa sa ospital.

“That time, I would remember my father saying to me that ‘Wala pa koy gihangyo ni San Vicente sa akong pag novena nga wala pa niya gihatag.’ I was really moved by that,” siya niingon.

Isip anak, niabot sa iyang huna-huna, lakip na ang kahadlok nga mouli siya sa iyang pamilya nga mag-inusara-nga pakyas siya sa pagluwas sa iyang amahan.

Apan dihang nawagtangan na unta silag paglaum, ang kahimtang ni Porferio miarang-arang.

Naulian kini sa kusog ug mihayag ang panagway. Nag-anam og kaulian ang kahimtang sa iyang amahan.

Makasulti na siya ug makalakaw sa iyang kaugalingon.

Na-discharge na siya sa ika-17 nga adlaw sa tambalanan, tukma sa kapistahan ni San Vicente Ferrer.

Kay di ganahan ang doktor nga dunay mamatay nilang pasyente sa sakit, gisultihan ni Dr. Francis ang uban niyang mga pasyente nga mokombate.

Gawas sa pagsalig sa ilang mga doktor, ilang ipadayon ang ilang pagtuo sa Ginuo ug padayong magpositibo sa ilang huna-huna.

Iyang gipasalamatan ang team sa mga doktor nga nag-atiman sa ilang amahan.

“The risk that they are putting in to take care of Covid-19 patients is beyond their call of duty,” siya nagkanayon. (WBS)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph