IDONAR ni Cebu City Councilor Renato "Junjun" Osmeña ang iyang usa ka buwan nga sweldo para pagpamalit og food packs alang sa labing kabos nga pamilya sa barangay Guadalupe kinsa wala pa maabti sa hinabang.
Si Osmeña nagkanayon nga nadasig siya sa gibuhat ni Presidente Rodrigo Duterte diin ang usa ka buwan niini nga sweldo nga P400,000 gihatag gihatag ngadto sa nagkinahanglan.
Di mominos P130,000 ang gigahin ni Osmeña gikan sa iyang sweldo para iyang ipalit og relief goods nga langkuban og buhas, sardinas, noodles ug uban pa. Matod ni Osmeña nga nahibawo siya nga adunay gitunol nga daghang tabang ang administrasyon ni Mayor Edgardo Labella apan ang iyang gibuhat mao ang pagdugang sa tabang.
Ang igsuon ni LTFRB-VI Regional Director Richie Osmeña niingon nga gumikan sa iyang gibuhat, nakaagni kini sa iyang mga higala nga motabang.
Si Junjun nagkanayon nga aduna nay iyang higala nga ni-donate sab og 15 ka sakong bugas ug iya sab kining gihatag ngadto sa barangay Cogon-Pardo ug Buot Taup kinsa nangayo usab sa iyang suporta.
Gitarget ni Osmeña nga makahatag siya og labing menos 500 ka pamilya kinsa maoy labing nanginahanglan apan mosaka pa ang gidaghanon niini kay aduna pay daghan nga motabang sa iyang relief operation. (PAC)