TULO ka establishemento ang mopahigayon og mobile market ngadto sa tanang barangay sa dakbayan sa Mandaue sugod Miyerkules, Abril 8, 2020.
Si Mandaue City Councilor Malcolm Sanchez, mitug-an sa Superbalita, nga ang tulo nga mitanyag kanila sa maong serbiyso mao ang Ali Agri Exim Corporation, Colonnade Supermarket ug Mandaue Chamber of Commerce Inc.
Kining mobile market initiative sa mga mitanyag nga establishemento ug gisuportahan sa gobyerno sa dakbayan sa Mandaue.
"Instead nga ang mga tawo mo-adto sa merkado, mo-adto sa supermarket ang gibuhat nato karon labi na sa City of Mandaue nga dad-on didto ang produkto," sigon ni Sanchez.
Magsugod na ang Ali Agri Exim Corp. ug operate sa ilang "Manok Caravan" sa Miyerkules.
Ang tibuok manok tag P110, ang atay P110 matag kilo, ang batikon P105 matag kilo, ang tinai ug tiil P50 ang kilo, ang ulo P10 ang kilo, ug ang botse P65 matag kilo. "Maka-save sila og P30 to P40," sigon ni Sanchez.
Magsugod kini sa pagsuroy ngadto sa Barangay Paknaan.
Matod ni Sanchez nga wala pa nila masuta kung kanus-a magsugod ang Colonnade ug MCCI.
Ang Colonnade naghimo pa sa ilang mga guidelines o mga pamaagi kung unsaon nila sa pagpahigayon ang ilang mobile market. Ang sagad sa ibaligya sa Colonnade sa ilang mobile market mao ang mga basic grocery items.
Samtang sa MCCI ang ilang ibaligya mga karne inubanan sa Virginia Food Inc.
Gani kung makasugod na ang MCCI sa ilang mobile market, mamahimong idungan kini sa Ali Agri Exim Corp.
Makig-alayon sab si Sanchez ngadto sa mga barangay kapitan nga i-anunsyo ang maong caravan ngadto sa ilang konstituwente.
Dugang ni Sanchez nga kung gusto ang mga kapitan nga mobalik sa ilang barangay ang caravan, mamahimo ra silang mopahibawo kanila og andam ra silang makig-alayon sa mga establishemento.
Ang mga mobile market wala naglimit kung pila ang paliton sa matag kustomer. (KFD)