USA na ka semana kapin nga gipaubos sa enhanced community quarantine (ECQ) ang Lalawigan sa Sugbo tungod sa hulga sa coronavirus disease (Covid-19) pandemic, apan si Gobernador Gwendolyn Garcia wa pa motakda og petsa kanus-a kini tapuson.
Bisan si Lapu-Lapu City Mayor Junard “Ahong” Chan milugway hangtod sa Abril 28, 2020 sa ECQ alang sa dakbayan tungod sa hulga sa mananakod kaayong sakit.
Alang kang Garcia, taas pa ang lanat sa adlaw ug kinahanglan nga mas pahugtan pa ang pagpatuman sa mga protocol ug border control sa lalawigan.
Kini tungod sa padayon gihapon nga pagsaka sa kaso sa Covid sa kaulohan ug Sugbo.
Sukad sa pag isyu sa kamandoan pagpaubos sa Lalawigan sa ECQ sa Marso 30, 2020, wala’y gilatid nga deadline kon kanus-a lang kutob ang ECQ.
Bisan pa man sa sunod sunod nga negatibo nga resulta sa Covid tests sa mga swab samples, gikan sa probinsya, si Garcia nagkanayon nga sayo pa kaayo nga moluwat na siya og kamandoan paglibkas sa ECQ o ba kaha ang paghatag og petsa kon kanus-a nalang kutob ang maong kamandoan.
“It is very early. In fact, we are just one week into our ECQ and that is why I cannot be cautiously optimistic with the results. I am a little hopeful but still it's so much better to be more strict in the implementation of our guidelines. I cannot say, yet. I do not want to give false hopes to the Cebuanos, I do not want them to look at a particular date. It would be like a promise that I would not be able to keep,” matod ni Garcia sa mga tigbalita sa Abril 6, 2020.
Kon moabot man ang ikaduhang hugna sa pag extend sa ECQ, matod ni Garcia nga mao na kini ang labing dakong hagit alang sa nasud ug sa Sugbo.
“A second wave would be the worst that could happen. Why? Because it would mean that all the sacrifices and all the economic loses that we have incurred during the first ECQ would have been just for nothing and we would be back to square one. That is why we must ensure that there must be no second wave”, matod ni Garcia.
Bag-ong normal
Hinungdan nga nanawagan si Garcia sa mga Sugboanon nga mosubay sa guidelines nga gipatuman sa pangagamhanan aron mapugngan pa ang pagkatap sa kagaw.
Kini tungod bisan pa man og gawasnon na ang nasud sa sakit, dili na mahimong normal ang tanan ug may guidelines gihapon nga sundon ang matag Sugboanon.
“In order to do that we should be more than 100 percent, we have to be 200, 300, 400 percent sure that we shall have already flattened the curve and beyond that, we will also need to able to come up with a strict protocol on the new normal. What do I mean? Even if we have lifted the ECQ, things cannot go back to the way it was. We all have to adjust to the new normal which will be guided by protocols on socializing, gatherings, ceremonies and other activities that used to define us as a community,” dugang ni Garcia.
Giinat
Gipahibawo ni Chan nga lugyawan ngadto sa duha ka semana ang quarantine period sa dakbayan ngadto na sa Abril 28.
Nahukman kini sa mayor sa dihang nadugangan ang nagpositibo sa Covid.
Ang bag-ong kaso mao ang senior citizen nga babaye sa Sityo Bagumbayan, Barangay Maribago ang natakdan pinaagi sa local transmission.
Base sab sa labing uwahing talaan sa City Health Office kagahapon, Abril 7, misaka ngadto sa 208 ang mga persons under monitoring (PUM) gikan sa 181 niadtong Abril 6, samtang pabilin sa 13 ang mga persons under investigation (PUI).
Adunay tulo ang nagpositibo sa Covid-19, samtang ang usa niini naka-recover na.
Alang sa mayor nga dili pa luwas aron libkason ang ECQ sa Lapu-Lapu.
Si Chan mipasalig nga adunay pay igong bugas o ubang hinabang ang Siyudad alang sa tibuok Abril.
Sinakong bugas
Iyang gipahibawo nga karong semanahona adunay dugang 50,000 ka mga sinakong bugas ang moabot.
Gani, ang ubang barangay anaa na sa ilang ika-upat nga hugna sa pagpang apod-apod sa bugas. Nabahin ang reaksiyon sa mga Oponganon sa bag-ong kamanduan ni Mayor Chan nga gi-post sa Superbalita Cebu Facebook page.
Adunay mga residente ang nagbagul-bol gumikan sa kalisod sa ilang kahimtang atol sa gipatuman nga ECQ kay naputol ang ilang panginabuhian.
Samtang ang pipila niuyon sa extension sa ECQ og dugang duha ka semana aron masiguro nga wa nay matakdan sa virus.
Ang Lapu-Lapu mipatuman sa ECQ sukad niadtong Marso 29 sa kadlawon, “until further notice” kon kanus-a matapos ang maong pagpatuman, apan sa bag-ong kalambuan, moabot sa usa ka buwan ang implementasyon lukop dakbayan. (FVQ)