SUPERBALITA CEBU

‘Naglaroylaroy’ gipanakop sa kapulisan

MOABOT sa 170 ka mga tawo ang nasikop sa gipahigayong pagpangsita sa Lapu-Lapu City Police Office (LCPO) sa mga enhanced community quarantine (ECQ) violators sa merkado publiko sa dakbayan niadtong Lunes sa hapon, Abril 6, 2020.

Uban ni LCPO Director Police Colonel Clarito Baja sa paglibot sa merkado si Lapu-Lapu City Mayor Junard “Ahong” Chan.

Kini human sila nakadawat og mga reklamo nga daghan ang magsuroy-suroy sa merkado nga way mga ECQ pass.

Ang uban nga duna, sumala pa, walay mga control number ug wala usay mga ngalan.

Ang uban usab sumala pa naglaroy-laroy ra gayud sa merkado ug wa mamalit kundili naglaag lang.

Wa hinuoy naatlang menor de edad sa gipahigayong pagpangsita sa kapulisan ug ni Chan.

Matod ni Baja nga ang nangasikop ilang gidala sa Lapu-Lapu City Sports Complex ug gipasabot sa lagda sa ECQ apan gipangbuhian ra usab dayon.

Awhag niya sa Oponganon sa pagbitbit kanunay sa ECQ pass nga adunay control number ug pirmado sa ilang kapitan ug aduna pay selyo sa kagamhanan.

“Wala na, gipauli na. Ang instruction ni Mayor nga warning, gi-warningan lang sila basta sunod kato na gyung pass nga tarong,” matod ni Baja. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph