PULIS nga sakop sa Drug Enforcement Unit (DEU) sa Waterfront Police Station gidakop sa mga pulis nga sakop sa Integrity Monitoring and Enhancement Group (IMEG) Visayas Field Unit (VFU), Regional Intelligence Division (RID) ug Regional Special Operations Group (RSOG) 7 sa Martes sa hapon, Abril 7, sa sityo Silangan 1, Barangay Tejero, Siyudad sa Sugbo.
Si Police Lt. Col.Christopher Rey Natnat maoy nangu sa entraptment operation batok kang Police Corporal Wenefredo Olongayo 31, kasamtangang na-assign sa Waterfront Police Station.
Matod ni Natnat nga usa ka reklamante ang niduol kanila ug nangayo og pakitabang kalabot sa usa sakop sa DEU sa Waterfront police tungod sa pagpangayo og aircon unit sa ilang dinakpan.
Human madawat sa IMEG-VFU ang reklamo, gihimo dayon ang plano sa usa ka entrapment operation ug pasado alas 3 sa hapon sa Martes, nahulog sa mga kamot sa IMEG Visayas si Olongayo.
Si Olongayo nga nahinabi sa Superbalita Cebu, niangkon sa iyang sayop.
Apan ang tinuod, matod niya, ang aircon unit iya sa ilang dinakpan, kinsang igsuon niini iyang gikasabot nga paliton ang unit og P10,000.
Dugang pa ni Olongayon nga ang igsuon nisugot na sa ilang kasabotan nga paliton ang aircon unit.
Kaso nga robbery extortion ug kalapasan sa Section 3 (e) sa Republic Act 3019 kun Anti-Graft and Corrupt Practices Act ang ipasaka batok sa pulis. (BBT)