TUNGOD kay nangapuno na ang mga selda sa kadaghan sa mga tawo nga nanglapas sa enhanced community quarantine (ECQ) ug curfew, ang kapulisan nangita nag laing paagi aron di madugangan.
Duna nay mga police station nga inay bilangguon ang mga dinakpan, ila kining gipahamtangan og diha-diha nga talagsaong silot: gipaluhod samtang gipabasa og mga bersikulo sa Bibliya ug ang uban giparosaryo.
Dunay gipangdakop nga gipa-seminar una gibuhian uban sa warning nga sa sunod, prisuhon na sila. (Lahi nga estorya)
Ang hepe mismo sa Cebu City Police Office (CCPO) nireklamo na sa nagpunsisok nga mga binilanggo nga niabot na og 684.
Tungod niini, nimando siya sa mga hepe sa police station sa pagpangitag paagi aron di madugangan ang gidaghanon sa mga piniriso.
Duna nay mga police station nga nagpaampo sa ilang mga dinakpan.
Tungod sa pagdasok sa mga piniriso, nabalaka si CCPO officer-incharge Hector Grijaldo nga hulga sa panglawas sa mga piniriso ang panagtapok bisan usa lang kanila masakit og coronavirus disease (Covid-19).
Sa 684 nabilanggo sa mga police station, 226 niini nadakpan tungod sa enhanced community quarantine sama sa paglapas sa curfew ug nasakpan nga nag inom sa gawas .
Ang 458 nadakpan tungod sa illegal nga sugal.
Ang matag selda sa matag police station adunay maximum capacity nga 15 ka piniriso, magdepende sa gidak-on sa police station.
Ang Mabolo police station adunay 27 ka binilango sa pagkakaron diin ang ilang minimum nga capacity 20 ka tawo.
Matod ni Police Major Dindo Alaras, hepe sa Mabolo police station nga ang iyang gihimo aron di mag takod ang mga piniriso, iyang giundang una ang dalaw.
Mahimo ra hinuon nga maka adto ang mga kabanay nga mag hatod sa pagkaon apan kutob lang sa ganghaan sa police station.
Nagbutang usab silang foot bath sa pultahan ug sprayhan ang mga tawo nga mo sulod sa police station.
Si Grijaldo nimando sa pagpasul-ob og face mask, pagpakaligo sa mga piniriso, social distancing ug kanunay manghugas og alcohol sa mga kamot.
Ang Talamban Police Station nagpatabang sa barangay officials sa pagdakop sa mga malapason sa ECQ, curfew ug liquor ban.
Si Sangguaniang Kabataan chair Christine Claire Bontuyan niingon nga ang kapulisan nisulti kanila nga mahimo rang sila ang modakop ug mosilot.
“Among papilion (dinakpan), pulis o barangay. Moingon man sila nga barangay kay mahadlok sila sa pulis,” sulti ni Bontuyan sa Superbalita Cebu.
Ang ilang madakpan gipahimo nila og community service, pinaagi sa pagrosaryo.
“Kon di sila magtarong, among pabalikon sa sugod aron gyud sila mag-serious,” sulti ni Bontuyan.
Argao
Ang kapulisan usab sa Argao nagpaampo sa ilang nangadakpan.
Wa na nila kini prisoha, ila kining gipaluhod, gipasaba og mga bersikulo sa Bibliya.
Ilang gipabuhat mao ang pag paluhod atubangan sa pader, bitbit ang Bibliya aron pabasahon sa mga bersikulo.
Matod ni Police Staff Master Sgt. Vivian Tamayo sa Womens and Children and Protection Desk, nga nahinabi sa Superbalita Cebu, di moubos sa 10 matag adlaw hangtud na sa gabii ang ilang madakpan.
“Sa pagkakaron, Sir, nga labi na mga first offender sila sa paglapas sa executive order, dili lang una namo pasakaan og kaso. Mao na nga nangita mi og pamaagi kon unsay angayang buhaton aron sila bisan sa ginagmay, magmatngon sila,”pasabot ni Tamayo.
Kon menor ang madakpan, mga ginikanan ang ilang ipatawag tinambungan sa social welfare officer. Kon bana, mga asawa ang ilang paadtuon sa police station.