MANAGRIBAL man tuod sila sa paugnat sa kusog apan nagkahiusa ang tanang teams sa Philippine Basketball Association (PBA) sa pagbuhi og wala'y puas nga hinabang alang sa mga apektado sa coronavirus disease (Covid-19) sa tibuok Pilipinas.
Ang San Miguel Corporation (SMC), nga maoy tag-iya sa San Miguel Beermen, Brgy. Ginebra Gin Kings ug Magnolia Ang Pambansang Manok Hotshots, maoy usa sa ningbuhi og labing dakong donasyon sa pagsulod sa ikaupat nga semana sa Enhanced Community Quarantine (ECQ) diin miabot na kini og dul-an sa usa ka billion ka pesos.
Basi sa taho sa Spin. PH, ang higanteng kompanya nakahatag na og P877.8 million sa kinatibuk-an lakip na niini ang personal nga donasyon sa president ug chief executive officer nga si Ramon S. Ang nga nagbalor og P100 million.
“We are reporting on our progress so that people will be assured that help is on the way, that many organizations are mobilizing and working together to support the government and our fellow Filipinos. Together, we will win this battle,” matod ni Ang.
Ang SMC mitaho Progreso sa ilang padayong inisyatiba aron makatabang sa frontliners, national government, local government units, ug uban pang mga organisasyon lakip na sa mga Pinoy nga nangataptan ning makalilisang nga virus.
“We are working with a broad and diverse base of partners - from the national government, to the LGUS; our hospitals and doctors, the non-profit groups and charitable institutions; church groups, the PNP and AFP--because we want to make sure that help gets to as many Filipinos as possible,” dugang ni Ang.
Gipasalig ni Ang nga magpadayon ang ilang pagtabang hangtod mahuman kining maong krisis sa kahimsog nga ningkuyanap na sa tibuok kalibutan.
Gipasalig sab ni Ang nga magpadayon ang operasyon sa ilang kompanya sa food production, power ug fuel generation aron dili magkuwang ang kinahanglan on sa mga tawo sa matag adlaw.
Ang ubang teams sa PBA hilabi na ang grupo ni Manny Pangilinan, nga maoy tag-iya sa Meralco Bolts, NLEX Road Warriors ug Talk N' Text Katropa, wala sab magkuwang sa paghatag og hinabang.
Hinuon wala'y gipagawas ang grupo ni Pangilinan og detalye kabahin sa progreso sa ilang mga donasyon.
Ang Alaska Aces nagpagawas og linibong mga kahon sa gatas aron ipang-apod-apod sa nagkadaiyang quarantine assistance stations.
Ang Blackwater Elite nanghatag og 36,000 ka mga Deo Soap ug anti-bacterial Deo Splash sa Kalookan City diin nahiluna ang ilang kompanya.
Ang tag-iya sa NorthPort Batang Pier ug 1Pacman party list representative Mikee Romero nanghatag usab og donasyon alang sa medical supplies ug groceries.
Nagsuporta sab si Romero sa produksyon diin himuon ang lambanog nga ethyl alcohol, nga usa sa labing kinahanglan ning maong pandemic.
Ang Columbian Dyip, Phoenix fuel Masters ug Rain or Shine Elasto Painters wala sab magmakuli sa pagtunol og nagkadaiyang mga donasyon.
Mas dali alang sa PBA teams ang pagpanghatag og donasyon gumikan kay temporaryo mang gihunong ang ilang liga ning panahon sa krisis. (ESL)