NBA prospect determinadong moduwa sa RP

GIPADAYAG og balik ni Filipino-American guard Remy Martin ang iyang intesyon nga makarepresentar sa Pilipinas sa international tournament taliwala sa iyang maanindot nga basketball career sa Arizona State University sa United States.

Dili pa lang dugay, gideklarar ni Martin nga andam na siyang magpa-draft sa National Basketball Association (NBA).

Gumikan sa maayo niyang gipakita sa college basketball sa US, nalantawan nang daan nga makakulit og pangalan si Martin sa NBA.

Gipasabot ni Martin nga dili mawala ang iyang interes nga makaduwa sa Pilipinas sa ugma damlag gumikan kay Pinay ang iyang inahan.

"My mom is Filipino, and that's everything," asoy sa 21 anyos nga basketbolista. "If you know me, I always wear the Filipino stuff. It just made me who I am."

Wala pa man tuod siya nakabisita sa Pilipinas apan nasayod si Martin kon unsa ka mahigugmaon sa basketball ang nasod.

"I always want to represent the country in the sport that they love," dugang ni Martin.

"They love basketball, they love watching, they love everything about the game."

Kon makuha siya sa umaabot nga draft, si Martin mahimong ikaduha ng Fil-Am nga makaduwa sa NBA sunod ni Jordan Clarkson sa Utah Jazz. (AP, ESL)