PADAYON sa ilang tahas ang grupo sa cancer survivors nga nahimong dragonboat paddlers taliwala sa pagpatuman sa enhanced community quarantine pinaagi sa pagpaambit sa ilang makadasig nga mga sugilanon ngadto sa social media.
Nanghinaot ang grupo. nga ang ilang gihimo makahatag og paglaom sa mga nakigbatok sa sakit nga cancer.
Ang Cebu Pink Paddlers Dragonboat Team, nga gilangkuban og mga babayeng cancer survivors, nag-post sa social media kabahin sa mga sugilanon sa pagpakabuhi aron paghatag og kadasig sa mga adunay sakit nga cancer hilabi na ning panahon sa krisis sa kahimsog nga hatod sa coronavirus disease (Covid-19).
“While we are in quarantine we post inspirational stories of our paddlers. We do this to share positivity and inspiration to those who are still fighting cancer and under medication,” matod ni head coach Christian Ian Sy sa interbyu sa Sun.Star Cebu, igsuon buhatan ning mantalaan.
Gikataho na ang mga adunay sakit sa cancer maoy labing dali ug labing delikado ng mataptan sa Covid-19.
“This is our initiative, with this simple act we can help and boost the faith of the cancer fighters,” batbat ni Sy.
“We can’t help them financially, but hopefully, in our own little way, these stories can help them to stay strong in their battle against cancer during this tough time."
Giangkon ni Sy nga adunay mga kabalaka ang ilang mga miyembro ning maong panahon sa krisis apan kinahanglan nilang motutok sa angayan nilang gimbuhaton aron makatabang sa komyunidad.
Gumikan sa Covid-19, nangakanselar ang tanang lumba nga salmutan unta sa Cebu Pink Paddlers lakip na niini ang international races sa Singapore ug Hong Kong.
Aron maseguro ang kaluwasan sa ilang mga miyembro, ang CPP mibalibad una sa imbitasyon gikan sa laing lumba sa Hong Kong karong Hunyo ug sa hinapos nga bahin ning tuiga.
“Safety first for our paddlers, they’re cancer survivors and very sensitive. Summer is usually the start of the Dragonboat Season but this is not a normal time because of the coronavirus,” pasabot ni Sy.
Hinuon bisan wala'y torneyo silang gisalmutan, matod ni Sy nga ang ilang mga sakop padayon nga nag-ensayo sa ilang tagsatagsa ka panimalay.
“After this pandemic, we will go out and continue with our goal which is to inspire cancer patients and show them that we are stronger than cancer,” asoy ni Sy. (RSC, ESL)