DOH: PUIs ‘magpuyo’ samtang maghulat sa resulta

AMINADO si Dr. Adriano Subaan, ang director sa Department of Health-Northern Mindanao, nga dakong hagit kaniadto sa ilang buhatan ang kalangan sa resulta sa swab test pagsuta kon nagpositibo ba sa coronavirus disease (Covid-19) ang usa ka patient under investigation (PUI).

Dugang niini nga naningkamot karon ang DOH nga dili na mahitabo nga adunay pasyente nga napagawas na o gi cleared bisan wala pa niabot ang resulta sa iyang swabtest.

“That is a challenge sa atoa nga dina mahitabo karon kay daghan nata og testing kits. Doul napod ang laboratory sa Davao,” tubag ni Subaan sa SunStar Superbalita kagahapon sa virtual press conference sa NorthMin Task Force for Covid-19.

Pasabot niini nga ang tanan nga PUIs gi-required ug gipaubos og kwarantinas.

“Sa karon dili na ingon ana kadugay sa una lang to nahitabo siya nga naay PUIs nga later on nagpositive. Pero kining atong PUIs gi-advise gyod ni sila nga dili sila maglakaw lakaw ang uban naa gani sa ospital,” matud niini.

Gisiguro sab niini nga less ang exposure sa PUIs ug gipahimangnoan nga magpuyo samtang gahulat sa resulta.

“Less ang exposaure nila and we were actually telling them nga magpuyo samtang naghulat sa resulta but there were circumstances nga kung nakagawas siya, this were PUIs nga mga asymptomatic basi sa atong obserbasyon, less infective,” pasabot ni Subaan.

Ang mga dili kaayo grabe ilain gihapon sa balay sa ilang kwarto lakip ang ilang mga kubyertos sa pagkaon, sa establismento o mga isolation units ug obserbahan sa health workers.

Kadto lamang ang di kaginhawa ang dalahon sa balay tambalanan o naghambin og grabe nga sintomas nga kinahanglan na og ventilator.

Gipasalig niini nga dili na mahitabo kini kay paspas na ang resulta ug daghan na ang testing kits. Ang mga swabtest nga pagadalhon sa Davao ang gadawaton na sa matag borders hilabina nga pipila sa kasikbit nga dapit ang ubos sa lockdown.

“Kung PUI ka pagpuyo sa lugar nga dika makatakod o ma isolate ka while waiting sa imong result,” hangyo ni Subaan.