Pagsul-ob og face mask mandatory na sa MisOr

ARON pagsunod sa abiso sa Department of Interior and Local Government (DILG), nagpagawas og executive order 2020-010-A si Misamis Oriental Governor Yevgeny Emano nga nagmando sa tanan katawhan sa lalawigan nga mogawas sa publikong lugar sa pagsoot ug face mask kanunay.

Giamendahan niini ang iyang unang executive order human nga nasabotan sa Department of Health (DOH), DILG ug mga mayor sa lungsod sa lalawigan nga gikinahanglan na kini sa katawhan panahon sila nga mogawas sa ilang tagsa tagsa ka puloy-anan ning padayon sa hulga sa Covid-19.

Ang lalawigan ubos gihapon sa genera community quarantine ug wala pay natalang nagpositibo sa Covid-19.

Sa maong kamandoan nakalatid niini nga kinahanglan na ang facemask kung mogawas sa tagsa tagsa ka puloy-anan ug labina anaa sa mga pampublikong lugar.

“Wearing of face mask including homemade or improvised is mandatory in all public places including privately owned food establishments and drug stores,” kamandoan ni Emano.

Si Dr. Adriano Suba-an, ang regional director sa Deparment of Health namahayag nga kanunay sila nanawagan sa katawhan nga kung molakaw sa panimalay kinahanglan magsul-ob og face mask aron maproteksyunan ang kaugalingon.

Matud niini nga diha sa paglakaw lakaw dili nimo mahibaloan kinsa ang imong mahimong katabo, kasakay ug mahuptan hinungdan kinahanglan kini.

Apan kung anaa sulod sa puloy-anan dili kini kinahanglan gawas lamang niadtong mga adunay mga sintomas nga nasinati aron di makatakod sa sakop sa pamilya.