BUOT ni Mayor Oscar Moreno nga i-apod apod una ang mga mask ayha pirmahan ug ipatuman ang ordinansa nga gisugyot ni Konsehal Edgar Cabanlas diin pagsilot sa mogawas sa pampublikong lugar sa siyudad mga walay gisul-ob nga mask.
Ang ordinansa nga 13849-2020 giduso ni Cabanlas diin nagmando sa katawhan nga mosulod sa siyudad ug maglakaw sa pampublikong lugar kinahanglan nga mag sul-ob og facemask kini kabahin sa pakigbatok coronavirus disease (Covid-19).
Atol sa daily press conference sa lokal nga kagamhanan sa siyudad gibutyag ni Moreno nga ayha kini mopirma sa maong ordinansa, kinahanglan nga matunol na ang mga mask nga gi-order.
“Mao ng nag order ta og mga mask sa I think mga 100,000 at least and mao na atong i-timing,” matud ni Moreno.
Gi-angkon niini nga naglisod kini nga ordinansa labi na nga problema sa pagpatuman tungod na usab sa kakulangon sa suplay sa mask sa dakbayan ug apeke ang katawhan.
“Mao na magbuhat nalang gyud tag mask and atong i-distribute, before nako pirmahan mag distribute nata sa mask as many as possible para katong dakpon kato na gyud dili na mokooperar,” dugang pa.
Gidugang pa nga pirmahan na niini ang ordinansa kung duna nay facemask.
“I will sign once the facemasks are available. Lisod man gud kaayo nga pirmahan ko and then people do not have facemask. Arang-arang man tong maka afford kay naa nay ila but what about those nga dili maka-afford mao na nga ato silang tagaan,” dugang pa.