PADAYON ang community quarantine sa siyudad sa Cagayan de Oro hangtod nga mawala na ang bahad sa coronavirus disease (Covid-19).
Gibutyag ni Mayor Oscar Moreno nga bisan pa man sa pag-ubos sa ihap sa patients under investigation (PUI) ug sa persons under monitoring (PUM) sa siyudad kinahanglan nga dili magkumpiyansa.
“Ang atong community quarantine continues until lifted. Wala’y atong gibutang nga time frame kay lage mo respond kita sa virus and unsay maayo nga estratihiya,” matud ni Moreno.
Gidugang pa nga dili man usab kini matagna kung kanus-a angayan na nga mobalik sa normal ang dakbayan.
“Kay mao lage we cannot set a timeline by ourselves kay actually ang timeline is set by the situation, the circumstances. Permanente atong community quarantine until lifted,” dugang pa.
Nasayran nga gilugwayan ni Presidente Rodrigo Duterte ang enhanced community quarantine sa Luzon hangtod sa Abril 30 tungod sa padayong bahad virus.