LAING duha ka mga patient under investigation (PUI) sa coronavirus disease (Covid-19) ang nakagawas na sa Northern Mindanao Medical Center (NMMC) niadtong Abril 6, 2020.
Ang duha ka mga pasyente sa maong ospital gikan sa Barangay Lumbia ug Upper Carmen, siyudad sa Cagayan de Oro.
Gibutyag ni Mayor Oscar Moreno nga nalipay siya tungod kay duna nay laing duha usab nga nakagawas ug ang importante nga nasayran ang kahimtang sulod sa maong ospital.
“Naa na sa’y duha na discharge sa NMMC, ang isa taga Lumbia ang usa taga Upper Carmen, kalooy sa Diyos,” matud ni Moreno.
Samtang gibutyag ni Dr. Jose Chan, Medical Director sa NMMC nga ang duha ka mga pasyente nga nadala sa maong ospital niadtong nilabay nga adlaw ug wala nagsemana nakagawas.
“Naa sila’y gibati pero dili kaayo tungod sa ilang gibati nga hilanat ug ubo kundili tungod sa other medical condition nga mas importante pa nga kinahanglang tambalan,” matud ni Chan.
Sa kasamtangan duna nala’y napulo nga pasyente ang nahabilin diin lakip niini ang tulo ka positibo sa coronavirus disease (Covid-19) nga padayong gipaabot pa ang laing resulta sa swab sample.