USA na lang ka patient under investigation (PUI) with mild symptoms ang anaa sa barangay dinhi sa siyudad sa Cagayan de Oro.
Niadtong Enero 3 hangtod Abril 2 anaa sa total nga 38 ang PUI nga gikan sa nagkadaiyang barangay sa siyudad apan atol sa daily press briefing kagahapon, Abril 7 usa na lang ang nabilin.
Gibutyag ni Dr. Joselito Retuya, epidemiologist sa siyudad, nga duha nalang ang nahabilin nga PUI diin ang usa mahuman na sa quarantine.
“Ang PUIs nato nagpabiling duha nalang ang isa ani is due for today,” matud ni Retuya.
Samtang gilaoman nga karong sunod nga mga adlaw, wala na’y PUI sa siyudad.
“Sa mga umaabot nga mga adlaw siguro ma zero na gyud ni siya,” dugang pa ni Retuya.
Nasayran nga tungod sa pag-ubos na niini nga ihap nagpahigayon ang taskforce Covid-19 ug mga health cluster sa siyudad og pag-house to house aron masuta ug masusi ang mga indibidwal nga dunay gihambing nga severe acute respiratory illness (SARI) ug Influenza like Illness (ILI) aron maoy i-monitor.
Naghangyo usab sila sa katawhan nga tubagon og insakto ang mga pangutana sa mga Barangay Health Emergency Response Teams (BHERT).
Nagpahimangno usab si Dr. Lorraine Nery, officer-in-charge sa City Health Office (CHO) nga dili magkumpiyansa bisan paman sa pag-ubos sa ihap sa PUM ug PUI ug magpadayon nga magpuyo sa balay.
“Dili magkumpiyansa gihapon padayon ta sa atong campaign nga stay at home, social distancing and frequent handwashing,” pahayag niini.