GI-AGHAT ni Mayor Oscar Moreno ang mga mag-uuma nga dunay mga produktong utanon nga makigkoordina sa Agricultural Product Office (APO) aron nga paliton sa dakbayan ang ilang produkto.
Matud ni Moreno nga gihimo na kini sa siyudad diin ang utanon nga gikan sa mag-uuma ang gihatag sa mga laing benepisyaryo.
“Actually, gibuhat na na nato for instance kanang mga farmers sa Bulao, Iponan kato atong gipang apod-apod nga utanon lain sad ni nga set of beneficiaries katong sa mga relocation projects ug piso-piso programs,” matud ni Moreno.
Gi-aghat niini ang mag-uuma nga mokontak sa tinugyanan sa APO labi na sa pagpangulo ni Paul Douglas Calingin kinsa maoy ulo niini nga cluster.
“Sa mga farmers nga naminaw kung naa mo’y mga utanon diha pakigkontak lang sa atong agriculture sila ni Rocky Calingin,” dugang pa.
Nasayran nga gitunolan ang mga residente sa relocation sites og mga utanon nga ayuda sa dakbayan sa apektado niining dakong bahad sa coronavirus disease (Covid-19).