GILUSAD sa Dakbayan sa Talisay Miyerkules, Abril 8, 2020, ang "Tabo sa Barangay," usa ka merkado nga mobisita sa kabarangayan isip usa ka lakang sa paglikay sa coronavirus disease (Covid-19).
Ang Tabo sa Barangay unang mipahigayon sa City Hall Grounds diin nagkalaing klase sa paninda ang anaa.
Giawhag ang mga residente sa Barangay Lawaan, Mohon ug UP Area nga moduaw sa maong merkado apan gipahinumdom nga mopraktis sa social distancing.
Saysay ni Talisay City Mayor Gerald "Samsam" Gullas nga ila kining gibuhat arong pagminos sa mga tawo nga mamalit sa Barangay Tabunok sanglit ubay-ubay na ang mangadto sa maong lugar.
Dugang ni Gullas nga ila usab kini nasabotan sa mga barangay kapitan ug adunay eskedyul ang matag barangay.
Suspendido usa ang Tabo sa Barangay karong Huwebes Santo ug Biyernes Santo apan kini mobalik Sabado, Abril 11 sa Barangay Cansojong. (JCT)