DIGOS CITY -- Dili na makatabok sa ubang lungsod ang mga Digosenue human gipatuman na ang enhanced community quarantine (ECQ) gikan alas 6 sa gabii, Miyerkules, Abril 8, hangtud sa alas 11:59 sa Abril 19.
Giawhag ni Mayor Josef Cagas ang tanang molupyo sa dakbayan nga motuman sa ECQ sanglit total lockdown na ang dakbayan.
Ilawom sa ECQ, wala na sab tugoti nga makasulod sa dakbayan gikan sa laing dapit gawas lamang sa mga adunay kaso sa panglawas, frontliners, kapulisan, militar, mga sakyanan nga maghatud og pagkaon, ug mga sakop Inter-Agency Task Force Covid-19.
Hinuon giklaro sa mayor nga magpabiling abri ang mga exit points ug mahimong makagawas ang mga molupyo sa siyudad apan dili na sila mahimong makabalik samtang gipatuman ang ECQ.
Hinuon magpabalin ang oras sa curfew gikan alas 8 sa gabii hangtud alas 5 sa buntag pagka-sunod adlaw apan gikinahanglan nga ang tanang tindahan o establisemento apil ang merkado publiko, manirado na pag-abot sa alas 6 sa gabii.
Bugtong gitugotan nga magpabilin sa pag-abri ang mga botika apan tanang tindahan sama sa 7/11, convenience store magsirado na sa alas 6 sa gabii.
Aduna say ipatuman nga odd and even scheme alang sa mga pampublikong sakyanan.
Mga traysikel nga even numbers ang plaka mahimong makabiyahe sa mga adlaw nga Lunes, Miyerkules ug Biyernes samtang ang mga odd numbers sa adlaw nga Martes, Huwebes ug Sabado apan walay biyahe sa tanang traysikel sa adlaw nga Dominggo.
Mamahimong mag-atubang og silot ang mga tawong molapas sa gipatumang balaod sa ECQ mao nga kinahanglang magpuyo sa ilang balay. (Orlando B. Dinoy)