DAVAO DEL NORTE -- Gihimong ospital o temporaryong kapasilongan sa mga cancer patients, uban sa ilang mga tig-atiman ang usa ka dakong hotel sa Barangay Apokon, siyudad sa Tagum.
Matud pa nga sugod niadtong Abril 3, 2020, lima ka mga cancer patients ug walo ka mga caretakers nga nagagikan sa Zamboanga, Butuan, Basilan ug Cotabato nga naa sa siyudad gumikan sa hataas nga proseso sa pagtambal ug chemotherapy sa Davao Regional Medical Center (DRMC) temporaryong giplastar sulod sa nahisgutang hotel.
Gibutyag nga ang mayor sa siyudad, Allan Rellon, maoy nakig-istorya sa tagdumala sa hotel aron himuong temporaryong papuy-an sa mga nahisgutang pasyente nga libre human nakita sa mayor ang sitwasiyon niini nga delikado sa hulga sa coronavirus disease (Covid-19).
Sumala pa nga malipayong gitubag sa tagdumala sa hotel ang hangyo sa mayor, hinungdan gihatagan og kahigdaan ug uban pang pasilidad ang matag pasyente sama sa kusina nga kalutoan sa inadlaw nilang pagkaon.
Gawas sa pagplastar sa mga nahisgutan, gihatagan usab sila og mga food packs, bottled water, face mask ug ubang pang mga gikinahanglang gamit gikan sa hotel ug sa mga tawo nga adunay mga malumong kasingkasing.
Gikanayon sa tagdumala nga ang doktor gikan sa Davao Regional Medical Center maoy nagabisita ug nagamonitor kanunay sa ilang kahimtang sa panglawas.
Tungod niini, dako ang pasalamat sa lokal nga kagamhanan sa Tagum, pinaagi ni Mayor Rellon, sanglit ang pag-abli sa pultanan sa hotel dako'g ikatabang sa mga tawo nga nanginahanglan og luwas nga kapasilungan labi ning panahon sa krisis nga gisagubang tungod sa Covid-19.