INGON sa gibaliwala ug way kahadlok sa coronavirus disease (Covid-19) ug enhanced community quarantine ang usa ka giilang big time drug supplier ug ‘shabu bodegero’ kinsa nakuhaan og upat kapin ka kilong shabu,
Ang suspek nga taga Dakbayan sa Carcar nasikop sa follow-up operation sa Talisay City Police Station, inabagan sa Carcar City Police station ug Regional Intelligence Division alas 12:30 Miyerkules sa udto, Abril 8, 2020.
Ang suspek giila nga si Roblen Mata Repdos, 42, taxi driver, taga sitio Bagacay, Barangay Valencia, Siyudad sa Caracar.
Si Repdos nadakpan sa mga pulis sa sitio Danao, Barangay Valencia atol sa buy-bust operation.
Siya nakuhaan og 4.6 kilos nga dunay Dangerous Drugs Board value nga P31,280,000.
Matod ni Police Major Gerard Ace Pelare, hepe sa Talisay City Police Station, nga Miyerkules sa kaadlawon, aduna silay nadakpan nga drug personality sa sitio Sangi, Barangay Tabunok ug nakuhaan og shabu.
Sa dihang giimbestigar kon kinsa ang iyang source sa illegal drugs, iyang gitudlo si Repdos.
Nakig alayon dayon sila sa Carcar Police, inabagan sa Police Regional Office 7.
Nakuha gikan kang Repdos ang 10 ka medium nga putos sa gituohang shabu, pito ka medium size ug tulo ka tea bag nga dunay Chinese markings nga adunay sulod nga shabu.
“During sa among interview (sa unang dinakpan), na reveal ang iyang (Repdos) ngan. So, we tried to transact, kay aron makakuha tag more bigger supply. Mao to ang nahitabo nga during sa transaction, palit tag usa ka kilo with koan na assisted sa Carcar City police station na,” matod ni Pelare.
Wa lang una nganli sa pagsuwat ning balita ang unang nadakpan sa Talisay police sa sitio Sangi, Barangay Tabunok, aron di masunog ang lain pa nilang follow up operation.
Giingong nabilanggo na si Repdos niadtong 2016 may labot gihapon sa illegal nga drugas ug nakagawas sa 2017 ug mibalik sa iyang illegal nga negosyo.
Subayon pa usab nila unsa nga drug group nasakop si Repdos. Gihulagway ni Pelare si Repdos nga bodegero sa illegal drugs. Siya ang tigtipig sa illegal drugs gikan sa Dakbayan sa Sugbo.
SUPORTA
Aron paghatag sa moral support ang director sa kapulisan sa Central Visayas nga si Police Brigadier General Albert Ignatius Ferro niadto sa siyudad sa Carcar aron pahalipayan ang mga pulis nga nalambigit sa operation.
Sigun sa nakuha nga kasayuran ni Ferro, gikan sa New Bilibid Prisons ang illegal drugs.
“Even if we have this health problem, we have to maintain the peace and order in every jurisdictional area here in Central Visayas,” matod ni Ferro.