GIHANGYO ni Dr. Adriano Subaan ang director sa Department of Health-Northern Mindanao ang katawhan nga dili i-discriminate ang mga health workers dinhi sa rehiyon.
Apela kini ni Dr. Subaan adtong Martes atol sa virtual press conference nga gipahigayon sa North Min Task Force for Covid 19 aron ang adunay gibati madasig sa pag-adto sa balay tambalanan.
“Amng giawhag nga magtimbayayong sa pagsugpo. Among kinasing-kasing nga paghangyo nga hunongon ang pag-discriminate aron madasig sa pag adto sa balay tambalanan ang adunay gibati,” matud ni Dr. Subaan ug mikondenar sa mga gahimo sa diskriminasyon.
“Atong gikondinar ang pag-discriminate sa mga healthworker nga nag atiman sa atong mga Covid patient,” dugang pa niini.
Sa uwahing listahan ang Northern Mindanao ang adunay mokabat 4,459 na ka person under monitoring ug 4,412 niini ang nakahuman na sa ilang 14 days nga quarantine samtang 47 ang gipaubos sa home quarantine.
Lakip sa gipanawagan ni Dr. Subaan nga kung nakasinati karon panahona ug hilanat, ubo, sip-on ug maglisod sa paginhawa modangop ug moduol gyod dayon sa balay tambalanan ug imonitor ang kaugalingon.
Karon sab nga padangaton ang holy week gihangyo niini ang katawhan likayan ang mga kalihokan nga maka kompromiso sa panglawas sa katawhan.
“Sa Semana Santa, pag obserbar sa social distancing labina kung di ka sigurado aron di makompromiso ang panglawas,” matud niini.