DILI angayang magkumpiyansa ug magpadayon sa mga preventive measures o padayong magtuman sa mga pahimangno sa lokal nga kagamhanan sa gobyerno ug sa Department of Health (DOH)-Northern Mindanao bisan sa padayong niubos ang ihap sa apektado sa coronavirus disease (Covid-19).
Nasayran nga nakagawas na sa balay tambalanan ang pasyente nga si PH597 kinsa 71 anyos nga lalaki nga taga numbered Barangay sa siyudad kinsa naka-rekober gikan sa hadla sa kamatayon tungod sa maong sakit.
Gibutyag ni Dr.Ian Christian Gonzales, head sa Infectious Disease Cluster sa DOH-Northern Mindanao, nga dili angayan nga magkumpiyansa gumikan kay layo pa kini sa kahumanan ilabi na nga dili pa usab Covid-free ang silingan nga mga probinsiya ug dapit.
“We are very thankful na very effective ang atong response so far in the City but ginahangyo nato ang publiko nga dili gihapon mag kumpiyansa. Layo pa ta sa kahumanan,” matud ni Gonzales.
Giingong kinahanglan nga padayon sa mga gihimo nga mga preventive measures sama sa paghugas og kamot, pagtabon sa baba kung moubo ug magsige og hugas sa kamot ug labaw sa tanan mas maayong magpuyo sa balay.
Gidugang pa ni Gonzales nga sayo pa kaayo aron modeklara nga contained na tungod kay kung tan-awon dinhi sa Rehiyon X medyo ni-menus ang pagsaka sa ihap sa person under monitoring (PUM) ug patient under investigation (PUI) gasaka pa kini sa ubang rehiyon. Giingong dili magkumpiyansa ug mamahimong responsable sa tagsa-tagsa ka mga kaugalingon aron matabangan ang pakigbatok niining maong sakit pinaagi sa pagpuyo sa balay.
“It’s too early to tell mao na atong gusto i-emphasized although naa ta’y confirmed case nga nag negative na, although wala ta’y naitala nga mga bag-o nga kaso for the past few days dili gyud ta angay mokumpiyansa,” dugang pa.