29,196 apektadong trabahante gitakdang makadawat og P5,000

LIBOAN ka mga trabahante nga apektado sa community quarantine sa dakbayan sa Cagayan de Oro ang napaubos na sa ebalwasyon ug gitakdang makadawat sa P5,000 sa Department of Labor and Employment (DOLE) tungod niining pandemic o coronavirus disease (Covid-19).

Anaa sa 950 ka mga kompanya sa siyudad ang na-evaluate na sa DOLE nga gilangkoban sa 29,196 ka mga empleyado ang apektado sa natala sukad niadtong Abril 6 ang gitakdang makadawat sa ayuda sa programa nga Covid-19 Adjustment Measures Program (CAMP).

Gibutyag ni Kathlene Kate Sorilla, Public Employment Service Office (Peso) manager, nga niadtong Abril 1 duna nay naaprobahan nga mga establisimento diin anaa sa 3,783 ka trabahante ang gitakdang makadawat sa ayuda nga P5000.

“Naa’y atoa as of April 1 ang approved 260 ka establishments, 3,783 affected workers,” pahayag ni Sorilla.

Gidugang pa niini nga ang mga establisimento o tag-iya sa negosyo nga duna’y mga empleyado ang makapahimulos niini nga programa.

“Atong mga employer nga dunay mga empleyado. Ang mga kompanya basta kay naay payroll mao ilang means nga mahibaw-an nga connected ka ana nga establishments,” dugang pa.

Kinahanglan usab nga ang tag-iya mismo ang mag-apply niini ug dili ang empleyado pinaagi na usab sa pagduso sa mga rekisitos sama sa establishment report sa private employer ug payroll sa mga trabahante ngadto sa gmail sa dole10cdo.covid19@gmail.com ug sa wala’y email pwedi nga magpatabang sa buhatan sa Peso sa Cagayan de Oro.

Mismo ang employer na ang mopahibalo kung pwedi na nga makuha ang ayuda pinaagi na usab sa ML Kwarta Padala ug gipahimangnoan nga ipatuman gihapon ang social distancing.

Gi-aghat usab niini ang mga tag-iya sa patigayon nga apektado nga lihukon na kini aron usab nga matabangan ug mahatagan og financial assistance ang apektadong mga trabahante.