GI-AGHAT sa lokal nga kagamhanan sa siyudad sa Cagayan de Oro ug sa Simbahang Katoliko nga mag-ampo ug manalangin diha na lamang sulod sa mga panimalay karong panahon sa Semana Santa.
Nasayran nga gisirado ang mga pilgrimage site sa dakbayan ug sa Misamis Oriental kini aron nga dili na makaagda pa sa pagdagsa ug pagtapok sa mga katawhan ug deboto sa usa ka dapit nga mamahimong makarisgo labi na sa posibilidad nga mataptan niining coronavirus disease (Covid-19).
Gibutyag ni Mayor Oscar Moreno nga duna’y mga pag-ampo kalabot na sa semana santa labi na sa Huwebes ug Biyernes santo lakip na sa Dominggo sa pagkabanhaw.
“Sa atong mga kaigsoonan nga katoliko, in our homes kani atong basahon family prayer during the Holy Week,” matud ni Moreno.
Gidugang pa niini nga sa balay na lang mag-ampo ug giingong mas maayong mag penitensiya sa sulod sa panimalay.
“Kaning sa estasiyon basahon na ni sa balay diha na sa balay mangadye di na kinahanglan nga moadto pa gawas sa balay,” dugang pa.
Nasayran nga duna’y mga relihiyosong kalihokan nga ipahigayon sa simbahang katoliko ug bisan sa ubang relihiyon apan kinahanglan nga ipatuman gihapon ang social distancing ug gidli ang pagtapok sa daghang ihap sa indibidwal.
Gidili usab una ang pag-adto sa mga beach resorts o sa bisan asa na lugar sa Easter Sunday diin duna mga panagtapok.