GITUGOTAN ni Mayor Oscar Moreno ang mga kalihokan sa Simbahan agi pagtamod sa Holy Week apan gisiguro nga dili kini makalapas sa gipatuman nga community quarantine labi na sa mass gathering ug social distancing dinhi sa dakbayan sa Cagayan de Oro.
Usa sa mga kalihokan sa Simbahang Katoliko labi na ang tinuig nga kalihokan sa Black Nazarene sa Holy week ang ipadayon apan duna’y plano nga karong panahona imbes nga prosesiyon ipaagi na kini sa motorkada diin sakay lang sa likod sa sakyanan ang imahen ug ang pari maghatag og panalangin samtang nagdagan kini. Gikabutyag nga duna’y plano usab nga moagi kini diha sa mga balay tambalanan.
Gani lakip ang ubang relihiyosong grupo ang gitugotan sa paghatag og wali basta nga magpabilin lang sa sakyanan ug dili mokanaog aron nga walay mahitabong panagtapok.
Gibutyag ni PMaj Evan Viñas, tigpamaba sa Cagayan de Oro Police Office (Cocpo), nga andam ang kapulisan ilabi na nga gitugotan man kini sa mayor sa siyudad diha sa paghatag og seguridad ug pagpatuman sa ordinansa sa dakbayan nga walay makalapas niini ilabi na diha sa bahad sa coronavirus disease (Covid-19).
Gidugang pa niini nga magdepende kini sa simbahan kung unsa ang ilang pamaagi niini nga kalihokan basta lang nga mapatuman kini subay sa kasamtangan nga kahimtang.
“It’s on the part of the religious leaders’ organizers po kay from to time it has changes. Cocpo will render security at any rate. Moreover, it was allowed by the chief executive for them to exercise their freedom of religion,” dugang ni Viñas.
Gibutyag usab ni Moreno nga nagpadala kaniya og sulat si Archbishop Antonio Ledesma kalabot na sa ipahigayong mga kalihokan nga kabahin usab sa Semana santa.
“Ang ato is we just have to make the arrangement...Naa’y mga plano ang simbahang katoliko in order to observe the lenten season and kani nga mga plano are all geared towards preventing gathering of people etcetera and ensuring naa’y social distancing,” matud ni Moreno.
Samtang ang mga misa usab sa St. Augustine Cathedral ang ipahigayon usab sa mga kaparian apan pinaagi sa social media sama sa Facebook diin karong Huwebes Santo alas 6 sa hapon, Biyernes Santo alas 3 sa hapon ug Holy Saturday (Easter vigil) alas 6 sa hapon.